ଆସିଥିଲା କାଲି ସେ ରାତିକ ପାଇଁ
ଆସିଥିଲା କାଲି ସେ ରାତିକ ପାଇଁ
କି କହିବି କି ହେଲା ଲୋ କାଲି ରାତିରେ
ଭିଜୁ ଥିଲି ପ୍ରୀତି ମେଘେ କାହ୍ନୁ ସାଥିରେ
ଅଧରେ ଅଧର ମଧୁର ଆଳାପ
ବାହୁ ଝୁଲଣାରେ ଝୁଲିଲି ଅଳପ
ଗଳପ ସରି ନଥିଲା ଗଲା ପଳେଇ
ଆସି ଥିଲା କାଲି ସେ ରାତିକ ପାଇଁ ।
ପାହାନ୍ତି ନିଦରୁ ଉଠି ହେଉଛି ବାଉଳି
କେଣେ ଗଲା ଏକା ଛାଡ଼ି ଦୁଷ୍ଟ ବନମାଳୀ
ଉଲୁରା କେଶକୁ ଅସଜଡ଼ା ବେଶ
କହୁଣୀ ରେ ଚାପି ଧରେ ପିନ୍ଧା ବାସ
ଲାଜରେ ଲାଜରେ କା'ରେ ପାରୁନି ଚାହିଁ
ଆସି ଥିଲା କାଲି ସେ ରାତିକ ପାଇଁ ।
ଯମୁନା ଯିବାକୁ ମନା କରୁଛି ନଣନ୍ଦ
ଶାଶୁ ଚାହେଁ ଆଖି ମେଲି ଭାବୁଛି କି ମନ୍ଦ
ଚନ୍ଦ୍ରସେଣା ରାଗ କରେ ଆନମନା
ନମାନନ୍ତି ସଖି କରିଲେ ବାହାନା
କେମିତି କହିବି ମିଛ ସତ ଲୁଚେଇ
ଆସି ଥିଲା କାଲି ସେ ରାତିକ ପାଇଁ ।
ବ୍ରଜବାଳା ଡାକୁଛନ୍ତି କଳସୀ କାଖେଇ
ଜଳ ଆଣି ଯିବେ ବେଳ ଉଚ୍ଛୁର ହୁଅଇ
ସକାଳ ସୂରୂଜ ଦିଏ ବେଶି ଲାଜ
ଗଞ୍ଜଣା ବାଜଣା ଛୁଉଁଛି ମଗଜ
ଦାଣ୍ଡେ ରାଣ୍ଡେ ଚାହୁଁ ଛନ୍ତି ଜଳକା ହେଇ
ଆସି ଥିଲା କାଲି ସେ ରାତିକ ପାଇଁ ।
ଅଣାୟତ ଚିତ୍ତ ଖୋଜେ ମୁରଲୀ ମୂର୍ଚ୍ଛନା
ଛାତିଏ ପ୍ରୀତିରେ ଛାତି ସହୁଛି ବେଦନା
ଯମୁନା ନଗଲେ ଯିବି ଯମ ପୁର
ଶ୍ୟାମ ପ୍ରେମ ମୋତେ କରୁଛି ଅଧିର
ବହଳେ ନିଦରେ ଆଖି ମୁଦୁ ତ ନାହିଁ
ଆସି ଥିଲା କାଲି ସେ ରାତିକ ପାଇଁ ।