ମହାବଳୀ ରାବଣ

ତ୍ରିପୁର ବିଜୟୀ ବୀର ବିଶ୍ରବା ନନ୍ଦନ

ସ୍ୱର୍ଣମୟୀ ଲଙ୍କା ଭୋଗ ମହା ବଳୀୟାନ ।

ପୁଷ୍ପକ ଯାନ ଦର୍ପଣ ଶିଳା ଯା ଅଧୀନ

ଦେବଗଣଙ୍କ ବିଭୁତି ଯା ପଦେ ମଣ୍ଡନ ।

ବିଶ୍ୱକର୍ମା ରୂପ ମୟଦୈତ୍ୟ ଯା ଶ୍ୱଶୁର

ଛପନ ଗଣ୍ଡା ଯୁଗକୁ ପାଇଥିଲ ବର ।

ଇନ୍ଦ୍ରଜିତ ଅତିକାୟ ଅକ୍ଷୟ କୁମାର 

ପୁତ୍ର ପୌତ୍ର ପ୍ରପୌତ୍ରଙ୍କ ମହା ପଟୁଆର ।

ପର ନାରୀ ହରିଲ ହୋଇଣ ମଦ ମତ୍ତ

ଅହଂକାର କାଳ ହେଲା ସୁଜ୍ଞାନୀ ପଣ୍ଡିତ !

ମହାବଳୀ ଭ୍ରାତା ପୁତ୍ର ନାଶ ଗଲା ପରେ

ଚେତନା ଉଦୟ କାହିଁ ନ ହେଲା ମନରେ !

ଭୀଷଣ ସମରେ ନଭ ଜଳ ସ୍ଥଳ ସ୍ତବ୍ଧ

ଶ୍ରୀରାମଙ୍କ ବ୍ରହ୍ମଶରେ ହେଲ ଶେଷେ ବଧ ।

ବାହୁବଳେ ମରଣ ଜିଣିବା ଅସମ୍ଭବ 

ଜଗତକୁ ଏହି ଶିକ୍ଷା ଦେଲ ହେ ବୈଶ୍ରବ। 

ରାବଣ ପୋଡି ପାଳନ ତୁଚ୍ଛ ପରମ୍ପରା

ରାବଣ ନାମଟି ମରି ହୁଏ ଦରମରା ।

ଘୃଣ୍ୟ ନୀଚ୍ଚ ଜନେ ଆଜି ଜଳାନ୍ତି ରାବଣ

ହେ ରାବଣ ଦଗ୍ଧୀଭୂତ ନ ହୁଏ କି ପ୍ରାଣ !