ମହାବିଦ୍ୟା ମାଆ ଷୋଡ଼ଶୀ

  

ଜୟ ମା ରୂପସୀ ଜୟ ମା ଷୋଡଶୀ

    ଜୟ ମା କରୁଣାମୟୀ l

ତ୍ରିପୁରା ସୁନ୍ଦରୀ ଜନ ମନୋହାରୀ

   ରାକ୍ଷସଙ୍କୁ ଦେଲୁ ମୋହି ll

ଶ୍ରୀଯନ୍ତ୍ର ବାସିନୀ ତ୍ରିପୁର ମୋହିନୀ

   ଜୟ ମାଆ ଶାକାମ୍ବରୀ l

ଜୟ ବିଶ୍ୱେଶ୍ୱରୀ ବାସ ବିନ୍ଧ୍ୟ ଗିରି 

   ଜୟ ମା ପରମେଶ୍ୱରୀ ll

ଜୟ ମା ଶ୍ରୀବିଦ୍ୟା ଲଳିତା ପ୍ରସିଦ୍ଧା

   ତ୍ରିପୁରା ରାଜ୍ୟେଧୀଶ୍ୱରୀ l

ସିଦ୍ଧି ବୁଦ୍ଧି ପ୍ରଦେ ତୋହରି ପ୍ରସାଦେ

   ସାଧକେ ସିଦ୍ଧି ପ୍ରସରି ll

ଷଡ଼ ଚକ୍ରେ ଧ୍ୟାନ ଶ୍ରୀବିଦ୍ୟା ସାଧନ

   ମହାବିଦ୍ୟା ବିଦ୍ୟାଦାତ୍ରୀ l

ତ୍ରିପୁରେ ଭ୍ରମଣ ତୋର ନିତ୍ୟ ଦିନ

   ବିଦ୍ୟା ବୁଦ୍ଧି ସିଦ୍ଧି ବାଣ୍ଟି ll

ଧରଣୀ ବକ୍ଷରେ ବିଜେ କଲୁ ମାଆ

   କେତେ ସ୍ଥାନେ ଦୟାକରି l

ଆଶ୍ରମ ବଦ୍ରିକା କାମ୍ୟା କୁମାରିକା

   ଦକ୍ଷିଣୀ ମଠ ଶୃଙ୍ଗେରୀ ll

ଶ୍ରୀକ୍ଷେତ୍ରେ ସୁଭଦ୍ରା ଝଙ୍କଡ଼େ ସାରଦା 

   ଶ୍ରୀବିଦ୍ୟା ବିଦ୍ୟା ଦାୟିନୀ l

ଶ୍ରୀବିଦ୍ୟା ସାଧିଲେ ଶାରଳା ବଶିଷ୍ଠ

    ପରାଶର ମହାମୁନି ll

ଆବର ସାଧିଲେ ଶୁକ ମହାଜ୍ଞାନୀ

   ବେଦବ୍ୟାସ କାଳିଦାସ l

ତୋର ଧ୍ୟାନେ ମାତ ଅଜ୍ଞାନ ବୋଲାନ୍ତି

    କବି କୋବିଦ ବିଦୁଷ ll

ଜୟ ମା ଷୋଡ଼ଶୀ ଜୟ ଚାରୁହାସୀ

    କରୁଣାମୟୀ ଜନନୀ ll

ତୋ ପଦେ ବନ୍ଦଇ ମାଆ ମହାମାୟୀ 

   ନମସ୍ତୁତେ ନାରାୟଣୀ ll