ମଗୁଶୀର ଛୁଟି ଦେଇଛି

    ଟିକି ଚଢେଇର ଖୁସିର ଗୀତରେ

       ସକାଳ ଯାଉଛି ଚହଲି

    କିଚିରି ମିଚିରି ଗାଉଛି ବସି ସେ

       ପୁଲକେ ଚାହିଁଛି ପହଲି

    ଗୀତଟି ମଧୁର ଲାଗୁଛି

    ମନମତାଣିଆ ସୁରେ ସୁରେ ତା'ର

       ଶିହରଣ ମନେ ଜାଗୁଛି ।। 

   ଖାଇ ସବୁଦିନ ଶାଗ ପଖାଳ ସେ

       ସୁମତୀର ହାତ ପରଶା

   ବିଲ ଆଡେ ଧାଏଁ ହେଲେ ହେଉ ପାଗ

       ଶୀତ ଖରା ଝଡି ବରଷା

   ଅଡୁଆରେ କେବେ ପଶେନି

   କାମକୁ ନ ଯାଇ ଅଳସୁଆ ହୋଇ

       ଘରେ କେବେ ଦିନେ ବସେନି ।। 

    ଆଜି ତା'ର ଚାଷ ବେଉସା ନ ଥିଲା

       ଭାବୁଥିଲା କିସ କରିବ

   ଭଲ ଲାଗିବନି ମାଟିର ସରଗ

       ଦିନଟା କେମିତି ସରିବ

   ଗୀତ ଯେବେ ସିଏ ଶୁଣିଲା

   ଭୁଲିଯାଇ ସବୁ ମଗୁଶୀର ମାସ

        ଖୁସିରେ ଖୁସି ସେ ଗୁଣିଲା ।। 

   ସୁମତୀ କହିଲା ହେଇ ଦେଖ ଏଣେ

       ମଗୁଶୀର ଚିଠି ଦେଇଛି

   ପବନ ଖେଳୁଛି ପାଚିଲା ଧାନରେ

       କ୍ଷେତ ବି ବଢିଆ ହେଇଛି

   କୁନି ଚଢେଇର ଗୀତରେ

   ଆହା କି ସୁନ୍ଦର ଆଜିର ସକାଳ

       ଅନୁଭବୀ ନିଅ ଚିତ୍ତରେ ।। 

   କଥା ଶୁଣି ଟିକେ ହସିଦେଇ ସିଏ

       ସୁମତୀକି ଚାହିଁ କହିଲା

   ଘରେ ଥିଲି ବୋଲି ମନ ସିନା ଆଜି

       ଚଢେଇ ଗୀତରେ ରହିଲା

   ଆଜି ମୁଁ ବିରତି ନେଇଛି

   ମନ ବୁଝି ମୋର ଚିଠି ଲେଖି ମୋତେ

       ମଗୁଶୀର ଛୁଟି ଦେଇଛି ।।