ମାଟିଘର
ମାଟିଘର
ଷଠୀପୂଜା,ଓଷା,ବ୍ରତ,ଜନମଦିନରେ,
ଅଷ୍ଟମୀ ଓ ମାଣବସା, ପୁଣ୍ୟପରବରେ,
ବୋଉହାତ ନାଲିମାଟି,ଗୋବର ଚିତାରେ -
କବାଟ ଓ କାନ୍ଥସବୁ ଝୋଟି ସାଜୁଥିଲା ;
ସତରେ ମୋ' ମାଟିଘର ଭାରି ଭଲଥିଲା ।।୧।।
ପାଠ ଶିଖୁଥିଲି ଯେବେ ମାଟିସିଲଟରେ,
ପାଟିକରି ଛାଟଖାଇ ଗାଁ ଟୁଙ୍ଗିଘରେ,
ବୋଉ କୋଳେ କାନ୍ଦୁଥିଲି ହାଣ୍ଡିଶାଳଟାରେ -
ଠାକୁମା' ଅବଧାନେ ଗାଳି କରୁଥିଲା ;
ସତରେ ମୋ' ମାଟିଘର ଭାରି ଭଲଥିଲା ।।୨।।
ଖେଳୁଥିଲି ଖେଳ-ଦାଣ୍ଡପିଣ୍ଡା ଶଗଡ଼ରେ,
କାଳିଆ କଷରା ସାଥେ ବେଙ୍ଗଳାଖଳାରେ,
କେବେ ଗୁହାଳରେ କେବେ ବିଲହୁଡାପରେ -
ଆମ ଧୋବ ବାଛୁରୀଟା ଡିଆଁ ମାରୁଥିଲା ;
ସତରେ ମୋ' ମାଟିଘର ଭାରି
ଭଲଥିଲା ।।୩।।
ଜେଜେଙ୍କର ନାଶଦାନୀ- ପାନବଟୁଆରେ,
ଠାକୁମା' ବଖରାର ସେ କଣମୁଛାରେ,
ବାପାଙ୍କର ମଳିମିଶା ସାର୍ଟ ପକେଟରେ -
ବୋଉ କାନି ଗଣ୍ଠିରେ ମୋ' ଧନ ଭରିଥିଲା ;
ସତରେ ମୋ' ମାଟିଘର ଭାରି
ଭଲଥିଲା ।।୪।।
ହାଣ୍ଡିଭାତ,ମୁଗଡାଲି,ମାଛବେସରରେ,
କାଞ୍ଜି,ଆଳୁ,ବାଇଗଣ, ଶୁଖୁଆପୋଡ଼ାରେ,
ଶାଗ,ଘାଣ୍ଟ,ଶିମ୍ବରାଇ,ମଞ୍ଜା ଆଚାରରେ -
ବଡିଚୁରା,ଛୁଇଁଭଜା ମନ ମୋହୁଥିଲା ;
ସତରେ ମୋ' ମାଟିଘର ଭାରି
ଭଲଥିଲା ।।୫।।
ପାଞ୍ଚହାତ ଭିଜୁଥିଲା ଗୋଟିଏ କଂସାରେ,
ଖଜୁରୀପଟି ଓ କନ୍ଥା ନିଦ ପରଶାରେ,
ଅଭାବେ ବି ଶାନ୍ତି ଥିଲା ଭଙ୍ଗା ଚାଳିଆରେ -
ଚିରାଫଟା ଦୁନିଆଁଟା ଖୁବ୍ ହସୁଥିଲା ;
ସତରେ ମୋ' ମାଟିଘର ଭାରି
ଭଲଥିଲା ।।୬।।
ବଦଳିଲା ଚେହେରା ମୋ' ଯେବେ ଧିରେଧିରେ,
ଘରଟା ବି ବଦଳିଲା ସମୟ ସୁଅରେ,
ଏକାଏକା ବସି ଭାବେ ଆଖିର ଲୁହରେ -
ଏକତାର ବନ୍ଧନଟା ବେଶ୍ ଟାଣ ଥିଲା ;
ସତରେ ମୋ' ମାଟିଘର ଭାରି
ଭଲଥିଲା ।।୭।।
🏡🏡🏡