ନୂଆ ବର୍ଷ
ନୂଆ ବର୍ଷ
ସମୟ ନଈ ଭଉଁରୀ ଖେଳେ
ନୂଆ ପୁରୁଣା ସାଥେ
ନୂଆ ଆସଇ ପୁରୁଣା ଯାଏ
କାହାଣୀ କହି କେତେ ।
ନୂଆ ପୁରୁଣା ସବୁତ ସେଇ
ଲିଳା ଭୟଙ୍କ ଲିଳା
ନୂଆ ବରଷ ନୂଆ ପରଷ
ନୂଆ ମହକ ବୋଳା ।
ଅଧ ରାତିରେ ତା ପାଦ ଶବ୍ଦେ
ଝୁମେ ଦୁନିଆ ସାରା
ବହଳ ରାତି ମଙ୍ଗଳ ଗୀତି
ମନକୁ କରେ ତୋରା ।
ଶୀତ ସାଉଁଳା କାକର ଭିଜା
ମାଟିକୁ ଛୁଇଁ ଛୁଇଁ
ନୂଆ ସୂରୁଯ ନୂଆ ମୁରୁଜ
ମନକୁ ନିଏ ମୋହି ।
ମଠ ମନ୍ଦିର ଗିର୍ଜାରେ ଭିଡ
ସକାଳ ହେଉ ହେଉ
ଈଶ୍ୱର ଆଲ୍ଲା ପ୍ରଭୁଙ୍କ ପାଦେ
ହୃଦୟ ଢାଳି ଦେଉ ।
ଭଲ ମନ୍ଦ ର ହସ କାନ୍ଦର
ସର୍ବନିଅନ୍ତା ସେହି
ତାଙ୍କ ଆଶିଷେ ଏ ନୂଆ ବର୍ଷ
ଆନନ୍ଦ ଯାଉ ଦେଇ।
ଆସିବ ବୋଲି ନୂଆ ବରଷ
ତା ବାଟ ଚାହିଁ ଚାହିଁ
ହଜାରେ ଆଶା ମନ ଗହନେ
ଉଠଇ ନିତି ଚେଇଁ ।
ନୂଆ କବିତା ନୂଆ କାହାଣୀ
ହୁଅଇ କେତେ ଲେଖା
ପ୍ରିତିର ଭାଷା ପ୍ରେମର ରଙ୍ଗ
ସ୍ନେହ ଶରଧା ସଖା ।
ନୂଆ ସକାଳ ପ୍ରତି ବହଳ
ନୂଆ ସପନେ ଝୁଲି
ଶୁଭ ବାରତା ହୁଅଇ ବଣ୍ଟା
ରାଗ ରୋଷ କୁ ଭୁଲି ।
ଖୁସି ବଣ୍ଟା ରେ ଅଣ୍ଟେନି ଦିନ
ଭୋଜି ଭାତ ର ମଜା
ମନ ଅଗଣା ଆନନ୍ଦେ ବଣା
ଫୁଲ ଗହଣା ସଜା ।
ବୟସ ଆଜି ମାନେନି ବୋଲ
ଖୁସିରେ ଝୁମେ ପାଦ
ପିରତି ହାଟେ ହଟ ଚମକ
ଲାଜେଇ ଯାଏ ନିଦ।
ନୂଆ ଭାବନା ନୂଆ ସପଥ
ଦେଖାଏ ନୂଆ ବାଟ
ହାତରେ ହାତ ମିଶାଇ ଦେଇ
ଝୁମଇ ଖୁସି ଗୀତ ।
ସ୍ବାର୍ଥ ଦଉଡି ଦିଏ ବିଗାଡି
ସମ୍ପର୍କ ସୂତା ଖିଅ
ଲୋଭ ରୁ ଭାବ ହୁଏ ଅଭାବ
ବଳେଇ ପଡେ କୋହ ।
ନୂଆ ସକାଳ ଶୁଭ ସକାଳ
ନୂଆ ବାରତା ଦିଏ
ଅଭିମାନ ର ଖାତା କୁ ଚିରି
ପ୍ରେମର ଭାଷା କହେ ।
ବୁଝାମଣା ରେ ମିଳଇ ଶାନ୍ତି
କଣ୍ଟା ବି କରେ ଗେଲ
ବଇରୀ ହୁଏ ଭାରି ନିଜର
ଭଗାରି ପାଏ ଭଲ ।