ମାଟିଘର
ମାଟିଘର
ଯେଉଁ ଘରେ ମୁହିଁ ଜନମ ଲଭିଲି
ବାଲ୍ୟସ୍ମୃତି ଥିଲା ଯହିଁ,
ଝାଟିମାଟି ସେଇ କୁଡ଼ିଆ ଘରଟି
ଅତୀତ ଯାଇଛି ହୋଇ |
ଯେଉଁଠି ମୋ ମାଆ ନୂଆବୋହୂ ସାଜି
ରଚିଲା ଘର ସଂସାର,
ସେ ଘର ନଥିଲା ମାଟିର କୁଡ଼ିଆ
ଥିଲା ସିଏ ସ୍ୱର୍ଗପୁର |
ଯାହା ବୁକୁପରେ ପାଦ ରଖିଥିଲି
ଚାଲି ଶିଖିଥିଲି ମୁହିଁ,
ଜନ୍ମଭୂମି ମୋର ଅତି ଆପଣାର
ମନୁ ପାଶୋରିବି ନାହିଁ |
କେତେ କେତେ ସ୍ମୃତି ସାଇତି ରଖିଛି
ମନର ଗଭୀର କୋଣେ,
ଫେରିବନି ଆଉ ହଜିଲା ଅତୀତ
ଯାହାଥିଲା ପିଲାଦିନେ |
ମାଟିଘରେ ଯେଉଁ ସୁଖଶାନ୍ତି ଅଛି
ମିଳିବକି ଉଆସରେ,
ମାଟିର ମଣିଷ ଅସ୍ତିତ୍ୱ ପାଉଁଶ
ମିଶିବ ଶେଷେ ମାଟିରେ |