ମାତୃଭୂମି ମାତୃଭାଷା
ମାତୃଭୂମି ମାତୃଭାଷା
ଜନନୀ ଠାରୁ କେ ନିଜର ହୋଇବ
ଜନମ ଦେଇଛି ସିଏ
ଅଳି ଅର୍ଦ୍ଦଳି କୁ ସହି ଯେତେ ସବୁ
ସାଦରେ କୋଳେଇ ନିଏ।
ଦରୋଟି ଅଧରେ ଶିଖାଇଛି କଥା
ଭାବ ବୁଝି ଏ ମନର
ପେଟ ମାରି ପେଟ ପୂରାଇଛି ଯିଏ
ତା'ଠୁ କିଏ ଆପଣାର ?
ସେଇ ତ ଦେଇଛି ଏ ସଂସାର ସୁଖ
ସମାଜ ରେ ପରିଚୟ
ସହିଛି କଷଣ ଆହା ନ କହିଣ
ମନକୁ କରି ତା'ଥୟ।
ଏଇ ଆଶା ମନେ ସଞ୍ଚିଅଛି ପୁଣି
ରଖିବା ତା'ର ମହତ
ସେ ଆଶା ତାହାର ମଉଳି ନ ଯାଉ
କରିବା ଆମେ ଶପଥ।
ଆମ ମାତୃଭୂମି ଆମ ମାତୃଭାଷା
ଆମ ପାଇଁ ମାଆ ପରି
ତା'ଠାରୁ କେ ଆଉ ଅଧିକ ଚିହ୍ନିବ
ମନ କଥା ଅସୁମାରୀ ?