ମାତା ମହାଗୌରୀ
ମାତା ମହାଗୌରୀ
ଅବତାର ଅଷ୍ଟମ
ଅବତରି ଧରାଧାମ
ମହାଗୌରୀ ନାମେ ପରିଚିତା.
ଶାନ୍ତ କମନୀୟ ରୂପ
ତେଜେ ବଳି ମହାଦୀପ
ଆସ ମାତା ହୋଇ ଚତୁର୍ହସ୍ତା. l
ଅପରୂପ ମୁଖ ଜ୍ୟୋତି
ଟଳିବେ ଅସୁର, ଯତି
ସେଥିପାଇଁ ମହାଗୌରୀ ନାମ୍ନୀ.
ବୃଷଭ ବାହନେ ଅବା
ଆସ ହସ୍ତୀର ବାହନେ
ଧରା ପୃଷ୍ଟେ ତିଥିରେ ଅଷ୍ଟମୀ. l
ଚତୁର୍ହସ୍ତେ ଆଶୀର୍ବାଦ
ଭରିଦିଅ ଭକ୍ତ ହୃଦ
ତ୍ରିଶୁଳ ଡମ୍ବରୁ ହସ୍ତେ ଧରି.
ବାତ୍ସଲ୍ୟ ମମତାମୟୀ
ଅବତର ଭକ୍ତପାଇଁ
ଆଶିଷ ଦାୟିନୀ ମାତା ଗୌରୀ. l
ପୁରପଲ୍ଲୀ ହସି ଉଠେ
ଉତ୍ସବ ମୁଖର ପୀଠେ
ନୂଆ ଉନ୍ମାଦନା ଯାଏ ଭରି.
ଶରଦ ଆକାଶେ ଶଶୀ
ବଉଦ ଉହାଡ଼େ ଲୁଚି
ଦେଖୁଥାଏ ତୁମ ଶୋଭା ଶିରୀ. l
ଅଷ୍ଟମୀ ତିଥି ନିଶିରେ
ମୃଣ୍ମୟୀ ମୂର୍ତ୍ତି ରୂପରେ
ପୂଜା ପାଅ ମାତା ମହା ଗୌରୀ.
ଶ୍ରୀଫଳ ନୈବେଦ୍ୟ ହୁଏ
ନାନା ଫଳଫୁଲ ଥାଏ
ହସୁଥାଏ ମାତା ବସୁନ୍ଧରୀ. l