ଲାଇବ୍ରେରୀ
ପ୍ରୋଫାଇଲ୍
ମାନବ ସେବା ହିଁ ମାଧବ ସେବା
ମାନବ ସେବା ହିଁ ମାଧବ ସେବା
ଧର୍ମ ମାନବତା କର୍ମ ମହାନତା
ଧର୍ମ ସଂସ୍କୃତି ଅନେକ
ବର୍ଣ୍ଣ ରଙ୍ଗ ଜାତି ବିଭିନ୍ନ ପ୍ରଜାତି
ରକ୍ତ ମାଂସ ହାଡ଼ ଏକ ll
ବିଚିତ୍ର ପ୍ରକୃତି ନର ଶ୍ରେଷ୍ଠ ଜାତି
ନିରୀହ ସେ ଅସହାୟ
ବଞ୍ଚିବା ରହିବା ବଢିବା ଖାଇବା
ନିଏ ସେ ଅନ୍ୟ ସହାୟ ll
ଏଠି ଯେ ସବଳ ତାର ସବୁ କଳ
ମୋହ ମାୟା କୂଟ ଛଳ
ଅସହ୍ୟ ଦୁର୍ବଳ ଛାଡି ସବୁ ଡାଳ
ଅପେକ୍ଷାରେ ମହାକାଳ ll
ଲୋଭ କାମନାରେ ସମ୍ପତ୍ତି ଲୋଭରେ
ସମ୍ପର୍କ ଏଠାରେ ତୁଛ
ସାଧୁତାର ବେଶେ ଶୋଷଣର ଫାଶେ
ସ୍ୱାର୍ଥ ସତ୍ୟ ସବୁ ମିଛ ll
ରୋଗ ଶୋକ ମୃତ୍ୟୁ ଅତ୍ୟାଚାରେ ଶତ୍ରୁ
ଆପଦେ ବିପଦେ ନର
ଦୁର୍ଘଟଣା ବେଳେ ଦୁର୍ଦ୍ଦିନର କାଳେ
ସହାୟତା ଦରକାର ll
ଅନ୍ନ ବସ୍ତ୍ର ଦାନ ସେବା ଧର୍ମ ଜାଣ
ନର ଦେହେ ନାରାୟଣ
କର ନର ସେବା ମାଧବର ସେବା
ଧର୍ମ ଆମ ସନାତନ ll
ସ୍ୱାର୍ଥ ତ୍ୟାଗ ବ୍ରତ ସେବାରେ ଆସକ୍ତ
ସେବକ ଈଶ୍ୱର ପ୍ରାପ୍ତ
ଦେଖାଣିଆ ସେବା ଲାଳସା ପାଇବା
ଦେଖୁଥାଏ ନିଜ ହିତ ll
ଶିକ୍ଷା ସ୍ୱାସ୍ଥ୍ୟ ସେବା ଶୋଷଣ କରିବା
ଅପାତ୍ର ଏଠାରେ ପାତ୍ର
ଆଇନି ସେବାରେ ମିଛକୁ ସତ୍ୟରେ
ରୂପାନ୍ତର ହୁଏ ମାତ୍ର ll
ଅନ୍ଧ ମୁକ ଛୋଟା ସେବା ହଟହଟା
ପଇସା ପ୍ରେମର ନାଟ
ଜରାଶ୍ରମ ଏଠି ନାମେ ଠକାଠକି
ନାରୀ ସେବା ନାମେ ହାଟ ll
ଧୋବ ଫର ଫର ନେତାଏ ଆମର
ଅଳିଆ ଠୁଳେଇ ସଫା
ସେବାର ନାମରେ ଫେସନ ବଜାରେ
ସେବା ଏଠି ରଫା ଦଫା ll
ସେବାର ଭାବନା ହୋଇଲେ ସାଧନା
ସାର୍ଥକ ହେବ ଜୀବନ
ଗୋଡାଣିଆ ସେବା ନୁହେଁ ସତ୍ୟ ସେବା
ସଚ୍ଚା ସେବା ପ୍ରୟୋଜନ ll
ସେବା ଫଳ ପୁଣ୍ୟ ଈଶ୍ୱର ଶରଣ
ସଂସାରରେ ଭାଗ୍ୟବାନ
ନିଃସ୍ଵାର୍ଥ ସେବାରେ ଜୀବନ ତ୍ୟାଗରେ
ସନ୍ତୁଷ୍ଟ ଯେ ଭଗବାନ ll
