ମାଗୁଣି
ମାଗୁଣି
ତୁମ ସମନକୁ ଏଡେଇବା ପାଇଁ
କାହାର ଅଛି ବା ସାଧ୍ୟ
କେତେବେଳେ ତୁମ ଶୀତଳ ପରଶେ
ପ୍ରାଣ ହୋଇଯିବ ବାଧ୍ୟ ।
ମାଟିର ଜୀବନ ମାଟିରେ ତ ପରା
ହୋଇଯିବ ଦିନେ ଲୀନ
କିଏ ସେ ମୋହର କିଏ ସାତପର
ନ ରହିବ ଚିହ୍ନବର୍ଣ୍ଣ ।
ଯା ' ପାଇଁ ଲଢିଲି ଯା' ପାଇଁ ବଢିଲି
ଖୋଜିଲି ଯା'ର ପଣତ
ସେ ପଣତ ଛାଇ ଆଢୁଆଳ କରି
ହୋଇ ପାରିଲାନି ନେତ ।
ଆତ୍ମାର ସ୍ଵରୂପ ଜାଣି ନ ପାରିଲି
ନିଜ ଇଛାମତେ ବାଟ
ଚାଲିବା ବେଳରେ ଓଗାଳି ବସିଲ
ଆବୋରିଣ ନିଜ ଥାଟ ।
କିଏ ନେଇନାହିଁ କାହାର ଦାୟିତ୍ଵ
କାହାପାଇଁ ଅଟକିନି
ଯେଉଁ କାମ ପାଇଁ କିଏ ତ ମାଧ୍ୟମ
ଜାଣିଶୁଣି ଥାଅ ତୁନି ।
ଆପଣା ଇଛାରେ ଭାଙ୍ଗଗଢ଼ ପୁଣି
କରୁଥାଅ ଶୂନ୍ୟପୂର୍ଣ୍ଣ
ଏ କଥା ନ ଜାଣେ ଏ ମୂଢ଼ ପରାଣ
ଛାତି କରଇ ବିଦୀର୍ଣ୍ଣ ।
ଓଠେ ଭରଦିଅ ମାଧୁର୍ଯ୍ୟର ସିନ୍ଧୁ
ଝରିଆସୁ ଅହରହ
ବିଶ୍ଵ କଲ୍ୟାଣରେ ଲାଗିଥାଉ ପ୍ରାଣ
ନ ହେଉ ଯେ ଦୁର୍ବିସହ ।