ମାଧୋ ସିଂହ

ସମ୍ବଲପୁରର ସଂଗ୍ରାମୀ ସୁରେନ୍ଦ୍ର ଗଢିଲେ ବିଦ୍ରୋହୀ ଦଳ,

ଘେଏଁସ ଜମିଦାର କରି ସମର୍ଥନ ମିଶାଇଲେ ନିଜବଳ ।

ଜମିଦାର ନାମ ମଧୁ ସିଂ ସିନା ମାଧୋ ସିଂହ ବୋଲି ଜଣା,

ତିନିପୁଅ ନେଇ ଯୁଦ୍ଧ ଆରମ୍ଭିଲେ ଇଂରେଜଙ୍କୁ କରି ବଣା ।

ମାଧୋ ସିଂହ ସେନା ପ୍ରବଳ ପ୍ରତାପୀ ଲଢିଲେ ଲଗାଇ ପଣ,

ଇଂରେଜ ଗୁଳିରେ ସହିଦ ହୋଇଲେ ବିପ୍ଳବୀ ଏଗାର ଜଣ ।

ସେକ୍ସପିୟର କ୍ୟାପଟେନ ଆସି କଲେ ଅଧିକାର ଘାଟି,

ଆକ୍ରମଣ କରି ଘେଏଁସ ଦୁର୍ଗକୁ ଭାଙ୍ଗି କରିଦେଲେ ମାଟି ।

ସମ୍ବଲପୁରର ନୂଆ କମିଶନ କର୍ଣ୍ଣେଲ ଫଷ୍ଟାର ବାବୁ,

ଚତୁର ପଣରେ କରିଲେ ଚଢାଉ ବିଦ୍ରୋହୀ ହୋଇଲେ କାବୁ ।

ମାଧୋ ସିଂହ ବୀର ଗୁଳିମାଡ଼ ଖାଇ ଶେଷରେ ପାଇଲେ ଫାଶୀ,

ସେହି ଫାଶୀକାଠେ ପୁଅ ବୈର ସିଂହ ପ୍ରାଣଦେଲେ ହସିହସି । 

ସମ୍ବଲପୁରର କାରାଗାରେ ଥିଲେ ଅନ୍ୟ ପୁଅ ତିନିଜଣ,

ନୁଇଁଲେନି ମଥା ବିଦେଶୀ ଆଗରେ ତେଜିଲେ ପଛକେ ପ୍ରାଣ ।

ବାପ ପୁଅ ଚାରି ସହିଦ ହୋଇଲେ ରଚି ନୂଆ ଇତିହାସ,

ଦେଶପ୍ରେମ ତ୍ୟାଗ ପ୍ରେରଣା ହୋଇଲା ରଖିଗଲେ ବୀର ଯଶ ।