ମାଆ ମୋତେ ଜନମ ଦିଅନି

ମାଆ ମୋତେ ଜନମ ଦିଅନି 

ଏଇ ମାଟି ପାଣି ପବନ ସହ 

ମୁଁ ଲଢ଼ି ପାରିବିନି  ।

ମାଆ ମୋତେ ଜନମ ଦିଅନି 

କଂକ୍ରିଟ ସିମେଣ୍ଟ ଉପରେ 

ଜନମ ଦେଇ ମୋତେ

ନିଷ୍ଠୁର କରନି ଯଦି ମୁଁ 

ଏନ୍ତୁଡ଼ି ଶାଳର ମାଟି ବାସ୍ନା 

କେବେ ହେଲେ ପାଇବିନି  ।

ମାଆ ମୋତେ ଜନମ ଦିଅନି 

ତମ କ୍ଷୀର ବଦଳରେ 

ଭେଜାଲ ଚାହୁଁନି 

ମୋ କଥା ବୁଝିବାକୁ 

ତମ ସମୟ ହେବନି ।

ମାଆ ମୋତେ ଜନମ ଦିଅନି 

ହାଣ୍ଡିରେ ଢେଉ ଖେଳୁଥିବା 

ଡହ ଡହ ରୋଗିଣା ଖାଦ୍ୟ 

ମୁଁ ଜମାରୁ ଚାହୁଁନି ।

ମାଆ ମୋତେ ଜନମ ଦିଅନି 

ଏକା ଏକା ନିଃସଙ୍ଗ ଜୀବନ 

ମୁଁ ଜିଇ ପାରିବିନି 

ମୋତେ ପୃଥିବୀକୁ ଜମାରୁ ନିଏନି 

ସାରା ଦିନ ଯଦି ତୁମେ 

ମୋ ପାଖରେ ରହିପାରିବନି ।