ମାଆ ଅତୁଳନୀୟା

ସବୁଠାରେ ରହି ପାରିବେନି ବିଭୁ ମାଆ ରୂପ ନେଲେ

ଈଶ୍ବରଙ୍କ ମଧ୍ୟ ମାଆଟିଏ ଅଛି ଆମେ ଭୁଲିଗଲେ !

ଗୋ ଗଂଗା ଗାୟତ୍ରୀ ମାତା ମାତୃଭୂମି ମାତୃତୁଲ୍ୟା

ହେଉ ସ୍ରୋତସ୍ୱିନୀ ଗଂଗା ହେଉ ଅବା ପାଷାଣୀ ଅହଲ୍ଯା !

ସୁଧାର ଗାଇ ହେଉ ଛେଳି କୁକୁଡା ଶାବକ ବିପଦେ

ସିଂହ ପ୍ରାୟ ଲଢିଯାଏ ସୁରକ୍ଷା ପାଦେ ପାଦେ।

ଅକ୍ଟୋପସ୍ ମାଆ ଜାଣିଚି ଜନ୍ମ କଲେ ନିଜେ ମରିବ

ସନ୍ତାନ ଜନମ ଦିଏ ସୃଷ୍ଟି ଆଗେ କିପରି ବଢିବ !

ଜିଜାବାଇ ଶିବାଜୀଙ୍କ ପିତା ମାତା ଶିକ୍ଷକ ସାଜିଲେ

ପୁତଲି ବାଇ ମାଆ ଯୋଗୁଁ ମୋହନ ମହାତମା ହେଲେ ।

ବାବୁରେ ପଢିଲେ ଜାଣିବୁ ଏପରି ଶିକ୍ଷା ମାଆ ଦିଏ

ସେଥିପାଇଁ ପୁଅ ଝିଅ ସମାଜରେ ଜଣେ ଗଣା ହୁଏ ।

ମାଆ ରକ୍ତ ମାଂସ ଧାରୀ ସିଏ ପୁଣି ନିରାକାର ପରି

ନଭ ଜଳ ସ୍ଥଳ ସବୁଠାରେ ରହିଛି ସେ ପୁରି ।

ବିଶ୍ୱବିଦ୍ୟାଳୟ ପାଠ ମାଆ ପାଖେ ହାର ମାନେ

ଏମିତି କେଉଁ ବିଦ୍ୟା ଅଛି ଯାହା ମାଆ ନ ଜାଣେ!

ମାଆ ଡାକ ସଂସାରେ ନିଆରା ମଶାଣିରେ କଥା କୁହେ

ମାଆ ଗାଳି ଦାଣ୍ଡ ଧୂଳି ଝାଡି ଦେଲେ ପୁଣି ସଫା ହୁଏ ।

ଘୋଡାଚଢା ବାପା ନଥାଉ ଧାନକୁଟି ମାଆ ଯଦି ଅଛି

ଦୁନିଆଁ ଦାଣ୍ଡରେ ଛିଡା କରିଦେବ ବିଶ୍ୱାସ ଅଛି ।

ଆଶା ଆକାଂକ୍ଷା ଉର୍ଦ୍ଧ୍ଵରେ ଆଶୀର୍ବାଦ ସଦା ଦେଇ ପାରେ

ଦୁଃଖ ନେଇ ସୁଖ ପୁଣି ରୋଗ ନେଇ ଭୋଗ ଦେଇପାରେ ।

ଲକ୍ଷ୍ମୀ ପରି ଧନ ବାଣୀ ପରି ବିଦ୍ୟା ଦୁର୍ଗା ପରି ଶକ୍ତି

ସନ୍ତାନକୁ ଦେଇ ପାରେ ମାଆ ନକର ପଛେ ଭକ୍ତି।