ଲୁହ

ଦେଖ ଦେଖ ଭାଇ ମୋ ଆଖିର ଲୁହ ଛାତିରେ ଛାତିରେ କୋହ,

ଖୋଜେନାହିଁ କେହି ବୁଝେନାହିଁ କେହି ଥିଲି ଗୋମାତାର ପୁଅ |

ହଳ ଚାଲୁଥିଲା ବେଙ୍ଗଳା ବି ଥିଲା ଲୋଡୁଥିଲେ ଆଗ ମୋତେ,

ଖାଉନ୍ଦ ଯତନ ନେଉଥିଲା ମୋର ଦେଉଥିଲା ଖାଦ୍ୟ ଯେତେ |

ବିଲରେ ଗୋଠରେ ମିଶି ଚରୁଥିଲି ଗାଈ-ବାଛୁରୀଙ୍କ ସାଥେ,

ଟ୍ରାକ୍ଟର ଚାଲିଲା ମୁଁ ହେଲି ଅଲୋଡ଼ା ଦୁଃଖରେ ସମୟ ବିତେ |

ଗାଈ ସିନା ହେଲା ମଣିଷର ପାଇଁ ଗୋମାତା ପୁଣି ପୂଜିତା,

ମହାଦେବଙ୍କର ବାହାନ ତ ଷଣ୍ଢ ହୋଇଛି ଜଗତ ଜିତା |

ସାଥୀ ନାହିଁ ମୋର ଜାତି ନାହିଁ ମୋର ଏଣେ ତେଣେ ବୁଲେ ଏକା,

ଷଣ୍ଢ ନୁହେଁ ମୁହିଁ ବଳଦ ହୋଇଛି ମଣିଷ ଦେଇଛି ଧୋକା |

ଗାଆଁ ଛାଡିଦେଲି ସହର ଆସିଲି କିଛି ଗୋଟେ କାମ ପାଇଁ,

ଵଳ ସିନା ଅଛି କାମ ନାହିଁ କିଛି ଅସଲ ବେକାର ମୁହିଁ |

 

ସହରିଆ ବାବୁ ମୋ ଶିଙ୍ଗକୁ ଦେଖି ସତରେ ଯାଆନ୍ତି ଡରି,

ବଳକା ଅଇଁଠା ପେଜ ମୁନ୍ଦେ କିଏ ଯାଚିଦିଏ ଦୟାକରି |

ଦଳଦଳ ଗାଈ-ବାଛୁରୀ ବୁଲନ୍ତି ଅଇଁଠା ଜରୀକୁ ଖାଇ,

ଷଣ୍ଢ ବି ଅଛନ୍ତି ବେମାର ହୁଅନ୍ତି ରାସ୍ତାରେ ପଡ଼ନ୍ତି ଶୋଇ |

ଘାସ କୁଟା କୁଣ୍ଡା ବିଲ ହିଡ଼ ବାଡ଼ ଦେଖିବା ସପନ ଏଠି,

ଫେରିଯିବା ପାଇଁ ବାଟ ପାଉନାହିଁ ମୋ ଜୀବନ ହେଲା ମାଟି |