ଲୁହ
ଲୁହ
ଦୁଇଟି ଅକ୍ଷର ନାମଟି ତାହାର
ଯାହାକୁ କୁହନ୍ତି ଲୁହ
ଥରେ ବହିଗଲେ ଭୁଲାଇ ସେ ଦିଏ
ମନର ସମସ୍ତ କୋହ ।
ଖୁସିର ଲୁହ ଯେ ଆନନ୍ଦ ଦିଅଇ
ଦୁଃଖ ଲୁହ ଦିଏ ଯନ୍ତ୍ରଣା
ଆପଣା ଲୋକଟି ଯେଉଁ ଲୁହ ଦିଏ
ସେ ଲୁହକୁ ଭୁଲି ହୁଏନା ।
ମାଆର ଆଖିର ଲୁହ ମଧ୍ୟେ ଥାଏ
ସାରା ଜଗତର ମମତା
ପିତାର ଲୁହର କାରଣ ଜାଣିବା
ସନ୍ତାନ ପକ୍ଷରେ ଅଜ୍ଞତା ।
ବନ୍ଧୁଟିଏ ଲୁହ ଝରାଏ ସର୍ବଦା
ଅନ୍ୟ ଏକ ବନ୍ଧୁ ଦୁଃଖରେ
ଶତ୍ରୁର ଲୁହକୁ ବିଶ୍ୱାସ ଯେ କରେ
ବୁଡିଯାଏ ସିଏ ଅନ୍ଧାରେ ।
ବିବାହ ବେଳରେ ପରିବାର ଠାରୁ
ଝିଅଟିର ହୁଏ ବିରହ
ବାପଘର ଛାଡି ଚାଲିଯାଏ ସିଏ
ସାଥେ ନେଇ ଦିଟୋପା ଲୁହ ।
ଆଖି ଲୁହ ଅଟେ ମଣିଷ ଜୀବନ
ଅଜାଣତେ ଯାଏ ବାହାରି
ମଣିଷ ଜୀବନ ଚାଲିଗଲା ପରେ
କେହି ନୁହେଁ ଏଠି କାହାରି ।