ଲୋଡ଼ା ନବ ଜାଗରଣ
ଲୋଡ଼ା ନବ ଜାଗରଣ
ପାଳୁଛି ଗରବେ ମୁକ୍ତିର ଦିବସ ସ୍ମୃତିକୁ ଉନ୍ମୁକ୍ତ କରି
ଚତୁର୍ଦ୍ଦିଗେ ଆଜି ଜୟ ହିନ୍ଦ ଧ୍ୱନି ପବନେ ଆସୁଛି ଝରି ।
ଅନ୍ତର ପଚାରେ ଏ କି ସ୍ୱାଧୀନତା ସତରେ କିବା ତୁ ଖୁସି
ନିମିଷେ ଭାବନା ବିସ୍ତାରିତ କରି ନୀରବରେ ଗଲି ବସି ।।
ଦେଶ ଗଉରବ ଲହୁ ଲୁହ ଦାନ ପୂର୍ବଜଙ୍କଠାରୁ ପ୍ରାପ୍ତି
ସେଇ ଦେଶେ ସ୍ୱାର୍ଥୀ ଦିଗଜଙ୍କ ମେଳି ନୀରିହ କାନ୍ଦୁଛି ନିତି ।
ଦୁର୍ନୀତି ପଶାରେ ସନ୍ତୁଳି ହେଉଛି ଅଭାବୀ ଆଖିର ସ୍ୱପ୍ନ
ଘର ଢ଼ିଙ୍କି ପରା କୁମ୍ଭୀର ସାଜିଛି ମୁକ୍ତି ଏଠି ମୂଲ୍ୟହୀନ ।
କାନେ ଶୁଭୁଅଛି ବିକଳ ଚିତ୍କାର କେତେ ବଧୂ କନ୍ୟାଙ୍କର
ସମାନତା ନୀତି ସତ୍ତାଶୂନ୍ୟ ଏଠି ପ୍ରହସନ ଅଧିକାର
ପ୍ରତି ପାଦେ ମୁହିଁ ଶଙ୍କିତ ପରାଣ ସୁରକ୍ଷାର ନାହିଁ ଆସ୍ଥା
ବିବେକ ବିଚାର ନାହିଁ ପଶୁଙ୍କର ଭାଷଣରେ ବଞ୍ଚେ ଶ୍ରୋତା ।
କେଡେ ମୁଁ ଅଜ୍ଞାନ କହୁଛି ସ୍ୱାଧୀନ ପରିଭାଷା ଅର୍ଥଶୂନ୍ୟ
ସ୍ୱାଧୀନ ଦେଶରେ ସ୍ୱାଧୀନତା ପାଇଁ ଲୋଡା ନବ ଜାଗରଣ ।