ଲୋ କୋଇଲି
ଲୋ କୋଇଲି
କୋଇଲି ଲୋ କେଶବ ଯେ ମଥୁରାକୁ ଗଲା
ଅନ୍ଧୁଣି କରିଣ ଧନ କାହିଁ ରହିଲା ଲୋ....
କେବେ ଦୂର ହୋଇନାହିଁ ମାଆ ନୟନରୁ
କିପରି ରହିଛି ଧନ ଭାଳୁଛି ହୃଦରୁ ଲୋ..... (କୋଇଲି )
ଅଝଟିଆ ପଣ କାହିଁ ଆଜି ବି ଛାଡ଼ିନି
ମାଆ କୋଳ ଖୋଜେ ଧନ ବଡ଼ତ,ହୋଇନି ଲୋ......
ନେତ୍ର ଦୁଇ ମୋର ଯହିଁ ରହିଲେ ଦୂରରେ
କିପରି ରହିବି ମୁହିଁ ତାଙ୍କ ବିନା ଘରେ ଲୋ... (କୋଇଲି )
ଅନ୍ଧୁଣି ଆଖିର ସାହା,ଭରସା ମୋହର
ଲୁହରେ ଭିଜୁଛି ଆଜି ପଣତଟା ମୋର ଲୋ.......
ମାଆ,ମାଆ ଡାକ ଆଜି ଶୁଭୁନାହିଁ ମୋତେ
ବିଛେଦ ଯନ୍ତ୍ରଣା ହୃଦ ସହିବ କେମନ୍ତେ ଲୋ.... ( କୋଇଲି )
ବାପା,ମାଆ ପରି ଶ୍ରଦ୍ଧା,ସ୍ନେହ ଦେଇ ହୃଦେ
କାହିଁ ଦୂରେ ଉଡିଗଲେ ଏକା କରି ମୋତେ ଲୋ........
ନିରତେ ଝୁରୁଛି ମୁହିଁ ଧନଙ୍କୁ ମୋହର
ଜୀବନ ଅସାର ଲାଗେ ଏ ମାୟା ସଂସାର ଲୋ.... ( କୋଇଲି )
ବାଢୁଥିବା ଅନ୍ନରେ ମୁଁ, ଦେଖେ ତାଙ୍କ ମୁହଁ
ମୋ, ହାତରନ୍ଧା ଶରଧା କେ ବାଣ୍ଟିବ କୁହ ଲୋ.........
ଲୁହରେ ବତୁରେ ଆଜି ସ୍ମୃତିକୁ ସାଇତି
ମୋହର ମହଣ ଜ୍ୟୋତି ନିଷ୍ପ୍ରଭେ ଧରିତ୍ରୀ ଲୋ.... (କୋଇଲି )
ବାଳ କାଳୁ ଅନୁରାଗେ ପାଳୁଥାଇ ଯିଏ
ଭାବନା କି ଥାଏ ଦିନେ ଦୂର ହେବ ସିଏ ଲୋ......
ପ୍ରାଣଠାରୁ ଶରୀର କି ଦୂରେଯାଏ କେବେ
ଦେହ,ଆତ୍ମା ଅଭିନ୍ନତ ଛନ୍ଦା,ବନ୍ଧା ଭାବେ ଲୋ..... (କୋଇଲି )
ନୀରବ ମନର ଭାଷା ମମତା ପୁଲକେ
ଲୁହ,ଲହୁ ଗଢାପ୍ରାଣ ଭୁଲି ପାରିବକେ ଲୋ......
ସମୟର ପକ୍ଷୀ ଆଜି ବାନ୍ଧିନିଏ ଛଳେ
ରାତ୍ରି ବୁକୁଚିରି ନେତ୍ରୁ ଲୁହରେ ପଖାଳେ ଲୋ...... ( କୋଇଲି )
ଅତୀତ ହଜିଛି ସ୍ମୃତି ସାଇତା ସମ୍ପତ୍ତି
ପିଲାଦିନ କୁନିମୁହଁ ମାଆ ସୁଖ ସାଥି ଲୋ....
ଦୁଇ ବେଳା ପ୍ରାର୍ଥନାରେ ଅନୁପସ୍ଥିତି
ଅନୁଭବେ ଦୁଃଖ ଯାହା ହୁଏ ନିତି ପ୍ରତି ଲୋ... (କୋଇଲି )
ଟିକେ ଦେହ ଅସୁସ୍ଥରେ ମାଆ,ମାଆ ହୋଇ
ପାଖରୁ ଅନ୍ତର କରି କ୍ଷଣେ ନ ରୁହନ୍ତି ଲୋ....
ଆଜି ମାଆ କୋଳ ଝୁରେ ନୟନ ଶଙ୍ଖାଳି,
ଆହା ମୋ ନେତ୍ର ପ୍ରତିମା ହୃଦ ବନମାଳି ଲୋ...... ( କୋଇଲି )
ଆଉଥରେ ଆସନ୍ତାକି ସେଇ ପିଲାଦିନ
ଖେଳନ୍ତିକି ବୋହୁଚୋରି ସାଥିରେ ମୋ ଧନ ଲୋ...
ଭାବ ଅଭାବ ବନ୍ଧନେ ଲୁଚେ ସବୁ ସ୍ନେହ
ବନ୍ଧ୍ୟା ପାଲଟେ ମମତା ସିକ୍ତ ହୁଏ ମୋହ ଲୋ..... ( କୋଇଲି )
କାଲିଯିଏ କାନିଧରି ଡରେ ଅନ୍ଧାରକୁ
ଆଜି' ଡର ହଜେ ସଂଗ୍ରାମ ବଞ୍ଚିବାକୁ ଲୋ.....
ଯେଉଁଠି ଥାଅ ମୋ' ଧନ ଶଙ୍ଖାଳି ପ୍ରତିମା
ସବୁ ସୁଖ, ଶାନ୍ତି ପ୍ରଭୁ ମାଗୁଛି ମଣିମା ଲୋ.... ( କୋଇଲି )