ଲେମ୍ବୁର ଦର

ଯାଉଥିଲେ ବାବୁ ମାର୍କେଟିଙ୍ଗ କରି

    ସ୍କୁଟିଟିକୁ ସଙ୍ଗେ ଧରି

ପଛରୁ ଡାକିଲେ  ବାବୁଆଣି ପଦେ

    ଟାଣ ଖରା ଦେଖି ଭାରି ।

ଖରାରେ ବୁଲିଲେ ସନ ଷ୍ଟ୍ରୋକ ହୁଏ

     ଲେମ୍ବୁ ପାଣି ଟିକେ ପିଅ

ଓଦା ଗାମୁଛାକୁ  ମୁଣ୍ଡରେ ପକେଇ

    ସଉଦା ପାଇଁକି ଯାଅ ।

ଦରାଣ୍ଡିଲେ ଡିବା  ଲେମ୍ବୁଟିଏ ନାହିଁ 

    କହିଲେ ଆଣିବ ଲେମ୍ବୁ

ଲସି ଦୋକାନରୁ   ସରବତ ପିଇ

    ବଜାରକୁ ଯିବ ବାବୁ ।

ବାବୁ ଚାଲିଗଲେ ଲସି ଦୋକାନରେ

    ଲେମ୍ବୁ ସରବତ ମାଗି

ଚେୟାର ଉପରେ ବସି ସେ ପଡିଲେ

    ଥକା ମେଣ୍ଟାଇବା ଲାଗି ।

କହିଲେ ଦୋକାନୀ ସରବତ ମିଳୁନି

    ଲେମ୍ବୁ ହେଲା ଚଢା ଦର

ଗିଲାସେ ପାଣିରେ ଫାଳେ ଲେମ୍ବୁ ଦେଲେ

    ଦାମ ତା ଅମୁଲ ମୁଲ ।

ବାବୁ ଚାଲିଗଲେ ସଉଦା କିଣିଲେ

    ପଚାରିଲେ ଲେମ୍ବୁ ଦର

ଲେମ୍ବୁ ଦର ଶୁଣି ବାବୁଙ୍କୁ କେଜାଣି

    ହେଲା ଶହେ ତିନି ଜ୍ୱର ।

ମୁଣ୍ଡେ ହାତ ଦେଇ ବସିଲେ ସେଠେଇ

     ଭାବି ହେଲେ ଆଗ ପଛ

ବଜ୍ରକାପ୍ତା ଭଳି ଲୋପ ପାଇଲା କି

    ପୃଥିବୀରୁ ଲେମ୍ବୁ ଗଛ ।

ସ୍ୱର୍ଗ ପୁରେ ଖରା ହୋଇଣ ଆତୁରା

    ଦେବତାଏ ମର୍ତ୍ତ୍ୟେ ଆସି

ଚୋରାଇ କି ନେଲେ ରାତି ଅଧିଆରେ

    ଲେମ୍ବୁ ଗଛୁ ଲେମ୍ବୁ କଷି ।

ସୂର୍ଯ୍ୟଙ୍କ ଦାଉରେ ଜଳ ଅଭାବରେ

    ଶୋଷରେ ବାନର ଦଳ

ତୋଳିକି ଖାଇଲେ ବସି ଗଛ ଡାଳେ

     ଥିଲା ଯେତେ ଲେମ୍ବୁ ଫଳ ।

ଅଜାଣତେ ବାବୁ କଥା ଭାବୁ ଭାବୁ

    ପହଞ୍ଚିଲେ ଘରେ ଆସି

ଦୁନିଆଁରେ ଆଉ  ଚଳି ତ ହେବନି

    ନାହିଁ ଗୋଟେ ଲେମ୍ବୁ କଷି ।