ଲାଜୁଆ ମିଶା ଅଳପ ହସ

ଲାଜୁଆ ମିଶା ଅଳପ ହସ

ନଖରେ କାଟ ଗାର,

ଜାଣିଲି ଇଏ ମନର କଥା

କହିବା ଲାଗି ଡର !

ଆଲୁରା କେଶ ମୁହଁରେ ପଡ଼େ

ଛାଟୁଛ ହାତ ଟେକି,

ମୁହଁକୁ ମୋର ଦେଖିବା ଲାଗି

ରହିଛ ଅବା ଟାକି !

ଆଖିର କୋଣେ ଅନେକ ଗପ

ହୋଇଛି ଲେଖା ସତେ,

ଭଲରୁ ମନ୍ଦ ସୁଖରୁ ଦୁଃଖ

ଦୁନିଆ ଯାହା ଯେତେ !

ଟେକିଲେ ମୁହଁ ସୂରୁଜମୁଖୀ

ଲାଗୁଛ ଆହା ଶିରୀ,

ଗେଲରେ କାଳେ ଛୁଇଁବି ଓଠ

ମନଟା ହୁଏ ଭାରି !

ଦେହର ବାସ୍ନା ମନକୁ ଛୁଏଁ

ରୂପର ଏକା ହାଟ,

ବାଟୋଇ ସିନା ସାଜିଛି ନିଜେ

ଆଶାର ପାଶ ବାଟ !

ବୁଝିବା ଲାଗି ବୟସ ଉଭା

ଭାବକୁ ଦିଅ ଖୋଲି,

ମରମ ସାଥେ ରାଣକୁ ଦେଇ

ଚଳିବା ଭଲ କାଲି !