କୁଜି ନେତା

ଶିକ୍ଷା ଦୀକ୍ଷା ନାହିଁ ଦୁଇ ଅକ୍ଷର.

କୁଜି ନେତା ଭାବେ ପାଏ ଆଦର.

କଥା କହିବାରେ ଭାରି ଚାତର

ମିଛ ଟାଉଟରି ସେ ଗନ୍ତାଘର ।

ଭୋଟ ଆସିଲେ କଚେ ପୁଅ ବାର

ଡାହା ମିଛ କଥା ତୁଣ୍ଡରେ ତାର.

ମୁଁ ଗାଆଁ ଯାକର ମାମଲାତକାର

ଗାଆଁ ଯାକ ଭୋଟ ପକେଟେ ମୋର ।

ମାଗୁଛନ୍ତି ଟଙ୍କା ଦିଅ ଚଞ୍ଚଳ

ନୋହିଲେ ଭୋଟ ଯିବ ତୁମର.

ବାଣ୍ଟୁଛି ମୁଁ ନିତି ମଦ ବିୟର

ତୁମ ପାଇଁ ଲାଗେ ମୁଁ ନିରନ୍ତର ।

ଟଙ୍କା ଆଣଇ ସେ ପୁଳାକୁ ପୁଳା

ନୀତି ଧରିଛି ସେ ସରବ ଗିଳା.

କିଛି ଟଙ୍କା ପାନ୍ତି କିଛି ଭୋଟର

ଆଉ ସବୁ ଟଙ୍କା ପକେଟେ ତାର ।

ଜିତି ଗଲେ ପାର୍ଟି ମାରେ ହୁଙ୍କାର

ରୋଜଗାର ପନ୍ଥା ଖୋଲଇ ତାର.

ଲାଟିନ ଆବାସ ବାଁ ହାତ ଖେଳ

ଏବେ କରିଦେବି ଟିକେ ସମ୍ଭାଳ ।

ଲାଟିନ ପାଇଁକି ଦୁଇ ହଜାର

ଅବାସରେ ନେବି ଦଶ ହଜାର.

ଯିଏ ଦେବ ଟଙ୍କା ହେବ ଚଞ୍ଚଳ

କଟିଗଲେ ଦୋଷ ନ ଦେବ ମୋର ।

ଭୋଟର ଦିଅନ୍ତି ଆଣି କରଜ

ହାଣ୍ଡିରେ ନ ଥାଉ ତାଙ୍କର ପେଜ.

ଘରଟିଏ ପାଇଁ ହୋଇ ବିକଳ

ଛପର ହୁଏନି ତା ଚାଳଘର ।

ଦିନ ପରେ ଦିନ ଯାଏ ତ ଗଡି

ଶକ୍ତ ପାନେ ପାଏ କାନ ରଗଡି.

ଚାହିଁ ଚାହିଁ ତାର ବୁଡ଼ଇ ବେଳ

କହିଲେ କ୍ରୋଧର ହୁଏ ଶିକାର ।