କୁହୁଳା ସମ୍ପର୍କ
କୁହୁଳା ସମ୍ପର୍କ
କଥାର ଚାତୁରୀ ରୂପର ମାଧୁରୀ
ପ୍ରୀତି ଭରା ମିଠା ହସ ,
ସମୟର ଏହି କଷଟି ପଥରେ
ଘୋରୁଅଛି ମିଠା ବିଷ ।
ଛଳନାରେ ଭରା ସମ୍ପର୍କର ସେତୁ
ଲହୁ ଲୁହାଣରେ ଭରା,
ସାମ୍ପ୍ରତିକ ଏଇ ସମାଜ ଭିତରେ
ସମ୍ପର୍କ ନ'ଦିଏ ଧରା ।
ନିଃଶ୍ୱାସ ବହ୍ନି'ରେ ଦରପୋଡ଼ା ଆଜି
ଆତ୍ମା ସହିତ ଆତ୍ମାର ,
ମଣିଷ ପଣିଆ ସ୍ୱାହା ହୋଇଅଛି
ଶୁଭୁଛି ଖାଲି ଚିତ୍କାର ।
ଅବକ୍ଷୟ ଏହି କୁହୁଳା ସମ୍ପର୍କ
ମୁଖାପିନ୍ଧା ମଣିଷର,
ଅତୁଟ ବିଶ୍ୱାସ ସତ୍କାର ହେଉଛି
ସହ୍ୟ କରି ଅତ୍ୟାଚାର ।
ତଥାପି ଭିଜୁଛି ନିର୍ଲଜ ମଣିଷ
ସମ୍ପର୍କର ବରଷାରେ ,
ଯେଉଁଠି ସମ୍ପର୍କ ବଳି ପଡ଼ିଅଛି
ବିନା ଯୁଦ୍ଧ ଓ ସନ୍ଧିରେ ।