କୁହ ହେ ଭକତେ
କୁହ ହେ ଭକତେ
କେଉଁ ଭାବେ ଡାକି ଥିଲ ହେ ଭକତେ
ମୋତେ ଟିକେ କହିବକି
କାଳିଆ ସୁନାର ମନ ଜିଣା ଗୁଣ
ମୋତେ ଶିଖାଇ ଦେବ କି ?
କେଉଁ ପୂଜାରେ ବା ପୂଜିଲ ହେ ଭକ୍ତେ
ତା ପାଖ ଲୋକ ହୋଇଲ
କାଳିଆ ସୁନାର ହେଲ ଗଣ୍ଠିଧନ
ଜୀବନ ଧନ୍ୟ କରିଲ ?
କେଉଁ ଅର୍ଘ୍ୟ ଅବା ଅର୍ପଣ କରିଲ
କେମିତି ଦୀପ ଜାଳିଲ
କି ନୈବେଦ୍ୟ ଅବା ସନ୍ତୁଷ୍ଟ କରିଲ
କିବା ଭାବେ ଭାସୁ ଥିଲ ?
ଶୁଣିଛି କାଳିଆ ପୂଜା ଅର୍ଘ୍ୟ ଅବା
ନଇବେଦ୍ୟ ଚ଼ାହେଁ ନାହିଁ
ସତ କୁହ ଭକ୍ତେ ଭାବେ କି କାଳିଆ
ବିଭୋର ଯେ ହେଉ ଥାଇ ।
ହାତ ଯୋଡ଼ି ଆଜି ପଚ଼ାରୁଚି ଭକ୍ତେ
ମୋତେ ଯେ ପରଖି ନିଅ
ମୋ ଭାବେ କେଉଁଠି ଉଣା ରହିଅଛି
ଟିକିଏ ବତାଇ ଦିଅ ।
ନାହିଁ ମୋହ ପାଖେ ଧନ ଦଉଲତ
ନାହିଁ ହେ ଭକତିର ଧାରା
ଭବ ସାଗରରେ ଭାସୁଚି ଭକତେ
ଦିଅ ହେ ଟିକେ ଇସାରା ।
କାଳିଆର ହସ ମନ ମୋହୁଅଛି
ଛଟପଟ ହୁଏ ମନ
ହେଲେ ସେ ଆସୁନି ଦେଖା ବି ଦେଉନି
ଲୁହରେ ଭିଜେ ନୟନ ।
ଥରୁଟିଏ ପାଇଁ ଦେଖା ଦେବା ପାଇଁ
କହି ଦିଅ ହେ ଭକତେ
ଜୀବନ ମୋହର ଧନ୍ୟ ହୋଇଯାଉ
ଜଣାଏ ମୁଁ ପ୍ରଣିପାତ ।