କରପାତ୍ରୀ

ବିଶୁଦ୍ଧ ପବିତ୍ର ଜଳ ସୁଶୀତଳ

ଅଭିମନ୍ତ୍ରୀତ ମୋ ତନ୍ତ୍ରୀ

ଗଙ୍ଗା ଗୋଦାବରୀ ବିନ୍ଦୁ ସନ୍ନିଧାନ

ନିର୍ଗମନ କରପାତ୍ରୀ ।

ମୁଁ ଆଶା ଆକା°କ୍ଷା ସୁନୀଳ ସପନ

ଜୀବନ ସଙ୍କଳ୍ପ ଉତ୍ସ

ନିବିଷ୍ଟ ତଲ୍ଲୀନ ଫଳଛାୟା ଦାନେ

ମୁଁ ସ°ସାର କଳ୍ପବୃକ୍ଷ ।

ମୁଁ ଆଦି ଶକତି ପ୍ରକୃତି ସ୍ୱରୂପା

ନିର୍ଝରେ ଅମୃତ ପ୍ରେମ

ସଞ୍ଚରେ ମଧୁର ସବୁଜ ସୁନ୍ଦର

ସୃଜନ ପାଳନ ଧର୍ମ ।

ହୃଦ ସରୋବରେ ବିକଶେ ରୁଚିରେ

ପ୍ରଫୁଲ୍ଲ ନୀଳ କମଳ

ସୁଖ ଶାନ୍ତି ମୂଳ ଆନନ୍ଦ ଉତ୍ସାହ

ପ୍ରବହେ ମଳୟାନିଳ ।

ମୁଁ କନ୍ୟା ରତନ ଲୋଡଇ ଯତନ

ସୋହାଗ ସ୍ନେହ ଆଦର

ଆଲୋକ ସୁରକ୍ଷା ଚାହେଁ ମୁଁ ବଢିବି

ଗଢିବି ଜୀବନ ପାତ୍ର ।

ରୋଧ କର ନାହିଁ ସ୍ୱଚ୍ଛନ୍ଦତା ମୋର

ଓଠେ ଫୁଟୁ ହସ ସ୍ମିତ

ହସୁ ଦୁଇ କୁଳ ତରୁଲତା ପ୍ରାଣ

ଗୁଞ୍ଜୁ ଜୀବନ ସଙ୍ଗୀତ ।