କର୍ମଫଳ

ସାଧନା ବଳରେ ସକଳ ତ ସିଦ୍ଧି ବିହି ଥିଲେ ଅନୁକୂଳ

ବିହି ବାମ ହେଲେ ସକଳ କରମ ହୁଅଇ ପରା ବିଫଳ ।

କର୍ମଫଳ କେହି ପାଉଥିଲା ବେଳେ କର୍ମରେ ଆସେ କା ବାଧା

କି କରି ପାରିବ ଛାର ଏ ମଣିଷ ବିହି ଯେବେ ମାରେ ବିଧା ।

ଧନ ଜନ ଜ୍ଞାନ ମାନ ସନମାନ ସକଳ ହୁଏ ନିଷ୍ଫଳ

ସାଧନା ବଳରେ ସକଳ ତ ସିଦ୍ଧି ବିହି ଥିଲେ ଅନୁକୂଳ ।

କର୍ମ ସଳଖରୁ କମଳା ପ୍ରାପତେ ବିଷ୍ଣୁ ହେଲେ ଭାଗ୍ୟବନ୍ତ

କର୍ମ ଅବେଳରୁ ବିଷ ପାନେ ଶିବ ହୋଇଲେ ବିଶ୍ଵବିଶ୍ରୁତ  ।

ସକଳ ସାମର୍ଥ୍ୟ ପାଶେ ଥାଇ ମଧ୍ୟ ପଣ୍ଡୁଙ୍କ ତନୟଗଣ

ହେଲେ ବନବାସୀ ଦେଲେ କୁଳଧ୍ଵଂସି ଲଢି ଯେ ଭାରତ ରଣ ।

ନିଜ ଗଉରବ କୁଳ ସଉରଭ କ୍ଷୟ ଯାଏ କଳବଳ

ବିହି ବାମ ହେଲେ ସକଳ କରମ ହୁଅଇ ପରା ବିଫଳ ।

ନଳ କାଟି ଘାସ କର୍ମ ବିପାକରୁ ରଚି ଯାଇଛନ୍ତି ଗାଥା

ହରିଶ୍ଚନ୍ଦ୍ର ପରା ଶ୍ମଶାନ ରକ୍ଷକ ଏ କଥା ନୁହଁ ଅନ୍ୟଥା ।