କଣ୍ଢେଇବିକା ଝିଅ

ଭାବିବା ପାଇଁ ବେଳ ନାଇଁ

କିଏ କଣ କହିଲା 

ଭଳିକିଭଳି କଣ୍ଢେଇ ଛଳରେ

କିଏ ମାଗିଲା ଯୌବନ , ଆକ୍ଷିଠାରରେ !

ବସଷ୍ଟାଣ୍ଡ, ପ୍ଲାଟଫର୍ମ

ଦୋକାନବଜାର, ସାହିଗଳି

ପାର୍କ ଅବା ସର୍କସର ଭିଡରେ 

ବୁଲୁଥାଏ କଣ୍ଢେଇବିକା ଝିଅ ।

ବାଉଁଶ ପାଛିଆରେଭରିଥାଏ 

କଣ୍ଢେଇ : ହାତୀ, ମାଙ୍କଡ଼, ଗଣେଶ, ଶିବ

ସୁନ୍ଦରୀଝିଅ, ସିଟିବୟ

ଆହୁରି କେତେ କଣ ଓ କହୁଥାଏ

'କଣ୍ଢେଇ ନିଅ, କଣ୍ଢେଇ'

ଯୋଡ଼ା ପନ୍ଦରଟଙ୍କା

କମରେ କମ ବାରଟଙ୍କା

ତା'ଠୁ ଆଉ ଜମା କମ ନୁହେଁ

କଣ୍ଢେଇ କିଣିବାକୁ କା'ର ତର ଥାଏ

ଜୀବନ୍ତ କଣ୍ଢେଇ ଥାଉଥାଉ 

ମାଟି କଣ୍ଢେଇ ? ଫୁ

ଏବେ ସହର ଗଳିକନ୍ଦିରେ 

ଜୀଅନ୍ତା କଣ୍ଢେଇମାନେ ବିକୁଥାନ୍ତି ନିଜକୁ

ଆଉ ପାଛିଆରେ ମାଟିକଣ୍ଢେଇ ନେଇ 

କଣ୍ଢେଇବିକା ଝିଅ ହନ୍ତସନ୍ତ ଜୀବନ ସଂଗ୍ରାମରେ ।

କଣ୍ଢେଇବିକା ଝିଅ

ବେଶ ବିକିପାରନ୍ତା ନିଜକୁ

ତାକୁ କିଣିବାକୁ ଗରାଖଙ୍କ ଭିଡ଼

ସାତସିଆଁ ଛୋଟପଣତରେ ବନ୍ଦ ରଖେ

ଇଜ୍ଜତ, ସନ୍ତର୍ପଣରେ 

କଣ୍ଢେଇବିକା ଝିଅ

କଣ୍ଢେଇ ବିକୁ ବିକୁ ସେ ନିଜେ ଯେମିତି

ପାଲଟି ନ ଯାଏ , କଣ୍ଢେଇଟିଏ