କମ୍ବଳ ଘୋଡେଇ ଶୋଇଛ

ସର୍ବ ଧର୍ମ ସମନ୍ୱୟର ଠାକୁର

   ତୁମେ ପ୍ରଭୁ ଜଗନ୍ନାଥ

ସପତ ବ୍ରହ୍ମାଣ୍ଡ ଈଶ୍ବର ଯେ ତୁମେ

   ଶ୍ରୀ ଚରଣେ ପ୍ରଣିପାତ

ପ୍ରଭୁ, ଝୁରୁଛି ସାରା ଜଗତ l0l

ରୋଗ, ଶୋକ, ମୋହ,କାମନାର ଉର୍ଦ୍ଧ୍ୱେ

    ସ୍ୱୟଂ ତୁମେ ପରମ ବ୍ରହ୍ମ

ସତ୍ୟ, ଧର୍ମ, ନ୍ୟାୟ ପ୍ରତୀକ ଯେ ତୁମେ

    ପତିତର ତ ପାବନ

ତୁମେ ହର୍ତ୍ତା କର୍ତ୍ତା ଦଇବ ବିଧାତା

    ସର୍ବେ ତୁମ ଠାରୁ ଜାତ l1l

ଯାହା ଇସାରାରେ ନବ ଖଣ୍ଡ ମହି

    ଆକାଶ ଛିଡି ପଡଇ

ଅଣସରେ ଶୋଇ ଅଛନ୍ତି ସେ ପ୍ରଭୁ

   ଜ୍ୱରେ କମ୍ବଳ ଘୋଡାଇ

ଷାଠିଏ ପଉଟି ରୁଚୁ ନାହିଁ ତାଙ୍କୁ

    ଶ୍ରୀ ଅଙ୍ଗେ ଗ୍ରାସିଛି ଶୀତ l2l

ବେଡିରେ ରହୁଛ ପଥି ଯେ ଖାଉଛ

    ଜଡି ବୁଟି ତାହା ସାଥ

ଶିଖାଉଛ ତୁମେ ଜଗତ ବାସୀଙ୍କୁ

     ନିରୋଗ ହେବାର ପଥ

ଜଗତର ଦୁଃଖ ସବୁ ତ ବୋହୁଛ

    ଟେକି ଦେଇ ଦୁଇ ହାତ l3l