କଳ୍ପନାତୀତ କଳ୍ପନା
କଳ୍ପନାତୀତ କଳ୍ପନା
କିଏ ଗଢ଼ିଅଛି ଏ ସାରା ବିଶ୍ୱକୁ
ନଦୀ,ବଣ, ଶ୍ୟାମ ଧରା
କିଏ ଗଢ଼ିଅଛି ସୁନ୍ଦର ଆକାଶ
ଖଞ୍ଜିଛି ଅସଂଖ୍ୟ ତାରା l
ବିଶ୍ୱ ସ୍ରଷ୍ଟାଙ୍କର ସୁନ୍ଦର ବିଶ୍ୱକୁ
ମନୁଷ୍ୟ ବିସ୍ମୟେ ଚିନ୍ତି
ସୃଷ୍ଟିର ରହସ୍ୟ ଜାଣିବାକୁ ଜ୍ଞାନୀ
ସଦା ପ୍ରୟାସୀ ଅଛନ୍ତି l
ଧରଣୀ ବ୍ୟତୀତ ବିଜ୍ଞାନୀ ମଣିଷ
ବିଶ୍ୱେ ଅଛି ଆଉ କେଣେ
ସ୍ପୁଟନିକ, ଆପୋଲୋ ମଣିଷ ପେଷିଲା
ଅନ୍ତରୀକ୍ଷ ଅନ୍ବେଷଣେ l
ତାରକା ସନ୍ଧାନେ ନିର୍ମାଣିଲେ ପୁଣି
ବିଶ୍ୱର ବିଜ୍ଞାନୀ ଗଣ
ମହାକାଶ ଜାନେ ଚଢ଼ି ବୁଲିଗଲେ
ବ୍ୟୋମଚାରୀ ଜଣ ଜଣ l
ପ୍ରଥମ ମହିଳା ମହାକାଶଚାରୀ
ଭାଲେନ୍ତିନା ତେରେସ୍କୋଭା
ମହାକାଶେ ଯାଇ ନିରୀକ୍ଷଣ କଲେ
ଗ୍ରହ ନକ୍ଷତ୍ରଙ୍କ ପ୍ରଭା l
ପଛେ ରହିନାନ୍ତି ବ୍ୟୋମଜାନେ ଗତି
କିନ୍ତୁ ଭାରତର ନାରୀ
କାଳେ କଲେ ଗତି ବ୍ୟୋମେ ମହାମତି
ଆମ କଳ୍ପନା ସୁନ୍ଦରୀ l
ରାକେଶ କହିଲେ ସାରା ଭୂମଣ୍ଡଳେ
ଭାରତ ମୋର ସୁନ୍ଦର
କଳ୍ପନା ଭଉଣୀ କହିଗଲେ ପୁଣି
ଜନ୍ମଭୂମି ନମସ୍କାର l
ହେ ଭଉଣୀ ତୁମେ ମନେପଡ଼ ଆଜି
ପ୍ରୟାଣ ଦିବସେ ଭାରି
ତାରାଟିଏ ତୁମେ ନଭୋମଣ୍ଡଳରେ
ମହିୟସୀ ନଭଚାରୀ ।