କିଶୋରଚନ୍ଦ୍ରାନନ୍ଦ ଚମ୍ପୂ (ନ)
କିଶୋରଚନ୍ଦ୍ରାନନ୍ଦ ଚମ୍ପୂ (ନ)
ନ
ରାଗ-କାମୋଦୀ
ନବ ବିଳାସିନି ରେ , ନକ୍ଷତ୍ରେଣ-ହାସିନି (ପଦ)
ନାହିଁ ବୋଲିବା ବାଣୀ ନିପଟ ନାହିଁ ଶୁଣି,
ନଳିନାକ୍ଷି ରେ ହୋଇ କିସ ହେବ,
ନନ୍ଦନନ୍ଦନ ପ୍ରେମା, ପ୍ରେମାରେ ନୁହେଁ ଜମା,
ନିତମ୍ବିନୀଙ୍କି ଯେବେ ଗତି ଥିବ(1)
ନିଷ୍ଠୁର ଗୁଣ କୁଳି- ଶରୁ ପଡିଛି ବଳି,
ନିଶ୍ଚୟ,ତିନି ବର୍ଣ୍ଣ ନାହିଁ ଲେଖି,
ନାଗରୀବି ମୋହନ, ମନ୍ତ୍ର ମାତ୍ରକ ମନ
କପଟ ସମ୍ପୁଟରେ ଅଛି ରଖି(2)
ନିନ୍ତରାୟ ରସ- ପ୍ରସାରଣେ ପିୟୁଷ
ଧାରାଧିକାରକାରୀ ପରି ଲାଗେ,
ନିମିଷକରେ ଜ୍ୱାଳା ଜନ୍ମାଏ ଜିଣି ହାଳା-
ହଳକୁ ଯେ ସଙ୍ଖାଳି ମହାନାଗେ(3)
ନିଶି ଦିନ ଶୟନ ନ ଜାଣଇ, ନବୀନ
ବିସିନୀଦଳ ଶେଯ ଯାଏ ଜଳି,
ନୀପବନ ପବନ ନିର୍ଦ୍ଧୂମଶିଖ ଧନ-
ଞ୍ଜୟ ଝାସରୁ କରେ କଟୁକେଳି(4)
ନିନ୍ଦାର ନିକେତନ ହୋଇବୁ ରେ ନୂତନ
ମନ୍ଦାର –ବିମ୍ବ- କୁରୁ ବିନ୍ଦା ଧରା,
ନିଶା- ରମଣ- କର - କଳିକା –କଣ- ତୋର,
ହୋଇଯିବ କଳ୍ପାନ୍ତକାଳ ଖରା (5)
ନ ବରଷରୁ ଉଣା କାଳୁ ତ ଅଛି ଜଣା
ନଖାଗ୍ରେ ଉଦ୍ଧରିଲା ଗୋବର୍ଦ୍ଧନ,
ନବନୀରଜ କୋଷ - ନୀଭ ତୋ କୁଚ କିସ
ଅଣ୍ଟିବ କଣ୍ଠୀରମଧ୍ୟା ଘେନ(6)
ନିବେଦନ କରୁଛି କରକଞ୍ଜ ଧରୁଛି
ହେଲେ ହେଉ ଅରୁଚି ନିଦ୍ରାହାରେ,
ନରନାଥ ଶ୍ରୀହରି –
ଚନ୍ଦନ ବନ୍ଦେ ଗୋରି
ନ ରସ ନୀଳବାହା ମୁଦ୍ରାହାରେ(7)