କିଛି ପାଇବାକୁ
କିଛି ପାଇବାକୁ
ନିଶ୍ଚଳ ବିହୀନ ପୃଥିବୀର
ପରିବର୍ତ୍ତନଶୀଳ ଜଗତରେ
ସମସ୍ତେ ଚଳଚଞ୍ଚଳ କିଛି ପାଇବାକୁ ।
ଦାରିଦ୍ର୍ୟର ଗୋଇଠା ପାହାରରେ
ସର୍ବଦା ଦୁଃଖିତ ମଣିଷ ବି
ଧାଉଁଛି କିଛି ପାଇବାକୁ ;
ଏଥିରେ ବଡ଼ କଥା ନାହିଁ
ନିଶ୍ଚିତ ଭାବେ
ଏ ଅପୁରଣୀୟ ପାକଯନ୍ତ୍ରକୁ
ଶାନ୍ତି ଦେବାରେ,
ନଷ୍ଟଶୀଳ ଶରୀରକୁ ସୁରକ୍ଷା ଦେବାରେ ।
ହେଲେ,
ହାତରେ ଅଛି ଧନ,ମାନ,ଯୌବନ ପରି
ଅମାପ ଶକ୍ତି ,ଯାହା
ଲୌକିକ ଜଗତର ଈଶ୍ୱର,ଯାହା
ନ ଥିଲେ ଜୀବନ ପଙ୍କ ପୂର୍ଣ୍ଣ
ଏ ଦୁନିଆ ଆଖିରେ,
ତଥାପି ସେ ଧାଉଁଛି
କିଛି ପାଇବାକୁ ।
ସମସ୍ତେ ଧାଉଁଛନ୍ତି ସେହି ଅମୂଲ୍ୟ ସମ୍ପଦ ପାଇବାକୁ,
ବୋଧେ ଯାହା ସମସ୍ତଙ୍କ ଶେଷ କାମ୍ୟ ।
ତାକୁ ପାଇଲା ପରେ ଆଉ
ପାଇବାର ପିପାସା ନ ଥାଏ ।
ପୁଣି ଏହା ପରମ ସତ ଯେ
ତାହା ମିଳିବା କଷ୍ଟସାଧ୍ୟ ,କାରଣ
ତାର ନାମ ଆତ୍ମତୃପ୍ତି ।