କିଛି ବାକି ରହିଗଲା

 

ଯେମିତି ଚିତ୍ରଟିଏ 

ଶେଷ ସ୍ପର୍ଶ ପାଇଲା ପରେ ବି 

କଳାକାରର ହୃଦୟକୁ 

ଗୋଟିଏ ଅଜଣା ଅଭାବ ବୋଧ 

କୋରି ପକାଏ । 

କବିତାଟିର ଭାବ ଆଉ ଭାଷା 

ମନଛୁଆଁ ହେଲେ ବି 

ହୃଦୟକୁ ଅଖଞ୍ଜିଆ ଲାଗୁଥିବାରୁ 

ଅସହାୟ କବିଟିର ଅନ୍ତର 

ଆଉଟି ପାଉଟି ହେଉଥାଏ ।

ପତ୍ରଟି ଝଡ଼ିଯାଇ ବି 

ଟିକିଏ ମାତ୍ର ଲାଗିରହି 

ହଲହଲ ହେଉଥାଏ । 

ପୁଣି ଯେମିତି ଗାଡ଼ି ଛାଡ଼ିବା ପରେ 

ଜଣେ ଦୁଇଜଣ ରହିଗଲେ 

ଷ୍ଟେସନରେ ଶେଷ ମୁହୁର୍ତ୍ତରେ ।

 

ଆଖିଟା କାଳେ ସବୁ କୁହେ 

କିଛି ଲୁଚାଇ ପାରେନି 

ତେଣୁ ଫେରିଲା ବେଳେ 

ତା' ଆଖିକୁ ସେ ଚାହିଁଲାନି 

କି ନିଜ ଆଖିକୁ ଦେଖେଇଲାନି ।

କିଏ ଜାଣେ , 

କ'ଣ ଲୁଚି ରହିଥିଲା

ଆଉ ବାକି ରହିଗଲା 

ଦୁହିଁଙ୍କ ହୃଦୟ ଭିତରେ ?