କି ହେବ ଅବା କେତେ ବୁଝାଇଲେ

ମିଲିଟାରୀ ଚାକିରୀ ସାରିଦେଇ ଅଜା,              

ରହୁଛନ୍ତି ଏବେ ଘରେ,             

 ଘରେ ସମସ୍ତଙ୍କ ଚଳଣି ଦେଖିଣ,                  

ହାତ ଦେଲେ ସେ ମୁଣ୍ଡରେ |         

ସାନଠାରୁ ବଡ଼ ସଭିଏଁ ମଡ଼ର୍ଣ୍ଣ,                      

କେହି ମାନେନା କା କଥା,         

 କି ହେବ, ଅବା କେତେ ବୁଝାଇଲେ,                 

ଘୁରିଯିବ ସିନା ମଥା  |          

 ସାନ ନାତିଟିଏ ତିନି ବର୍ଷ ହେଲା,                  

ଡାକିଲେ କହୁଛି ଚୁପ,             

ସବୁବେଳେ ଖାଲି ମୋବାଇଲ ଧରି,                 

ଦେଖୁଅଛି ଫେସବୁକ |           

ବାପାମାଆ ବୋଲି ନାହିଁ ତା ଖାତିରି,                

ନିଜ ଇଛାରେ ସେ ଚାଲେ,          

କି ହେବ ଅବା କେତେ ବୁଝାଇଲେ,                

ଏ ନବୀନ ଯୁଗର ପିଲେ |          

ଘରକୁ କେହି ବି ଅତିଥି ଆସିଲେ,                  

ପାଣି ଢାଳ ଆଗେ ନେଇ,         

ନାହିଁ ନମସ୍କାର, ହାଲୋ ହାଏ କହି,                  

ଦିଅନ୍ତି ଘରେ ପୁରାଇ  |         

 ଲେମ୍ବୁପାଣି, ଚାହା ଘରେ ହୁଏନାହିଁ,                  

ହୋଟେଲରୁ ମଗାଇଲେ,          

କି ହେବ ଅବା କେତେ ବୁଝାଇଲେ,                  

ଅତିଥି ତ ଖୁସି ହେଲେ   |        

ବୋହୂଟିଏ ଘରେ ଦେଖା ଯାଆନ୍ତିନି,                

ମଥାରେ ଓଢଣୀ ଦେଇ,            

 ଓଢଣୀ କି ଦେବେ ଶାଢ଼ୀ ପିନ୍ଧନ୍ତିନି,               

ଡ୍ରେସ ପିନ୍ଧି ବୁଲୁଥାଇ  |            

ମାଆର ପଣତ ବୁଝିପାରେ ନାହିଁ,                 

ଆଜିର ମଡ଼ର୍ଣ୍ଣ ଛୁଆ,              

କି ହେବ ଅବା କେତେ ବୁଝାଇଲେ,               

 ଲୁଗା ପିନ୍ଧିବନି ମାଆ  |            

ବିଦ୍ୟାଳୟ ଏବେ ଭେଳା ଭେଳା ପୁଣି,               

ଯାଉଛନ୍ତି ବହୁପିଲେ,            

 ପାଠଶାଠ, ଗୁରୁଭକ୍ତି ଛାଡ଼ିଦେଇ,                 

ମନ ଇଚ୍ଛା ଯାହା କଲେ  |           

ଟିଭିରେ କାର୍ଟୁନ, ମୋବାଇଲ ଖେଳ,               

ମାଆ ଦେଖେ ସିରିଏଲ,            

କି ହେବ ଅବା କେତେ ବୁଝାଇଲେ,                 

ଲାଗେ ସବୁ ଗୋଳମାଳ  |          

ବାପା ମାଆ ଡାକ ଭୁଲିଗଲେଣି ସେ,               

 ଡାକି ଡାକି ମମି ଡାଡି,             

ବୃଦ୍ଧକାଳେ ସେବା କରିପାରନ୍ତିନି,                 

ଦେଇ ବୃଦ୍ଧାଶ୍ରମେ ଛାଡି  |          

 ନିଜେ ବାପାମାଆ ହୋଇଗଲା ପରେ,              

 ଭୁଲନ୍ତି ବାପାମାଆଙ୍କୁ,            

କି ହେବ ଅବା କେତେ ବୁଝାଇଲେ,                   

ଭାଳି ନିଜ କପାଳକୁ  |