ଲାଇବ୍ରେରୀ
ପ୍ରୋଫାଇଲ୍
ଖିଏ ହସ
ଖିଏ ହସ
1 min
419
ଅଭିଶପ୍ତ ଥିଲା ଜୀବନ ଆମରି
ନିଃପୁତ୍ରିକ ଦୋଷ ପାଇଁ
ତୋର ଆଗମନେ ଜନ ମାନସରୁ
ସବୁ ଦୋଷ ଗଲା ଧୋଇ
ତୋ କୁଆଁ ଡ଼ାକରେ ସରଗ କୁସୁମ
ଆକାଶରୁ ପଡ଼େ ଝରି
ବଉଳ ବସନ୍ତ ପୁଲକିତ ମନେ
ଆସିଛନ୍ତି ପୁଣି ଫେରି
କୋଇଲି ଗାଉଛି କୁହୁ ତାନ ତୋଳି
ତୋ ପାଇଁ ମଧୁ ସଙ୍ଗୀତ
ଚନ୍ଦ୍ରମା କହୁଛି ବାଦଲ ଫାଙ୍କରେ
ବସିବ ତୋ ସାଥେ ମିତ
ଗୃହଲକ୍ଷ୍ମୀ ହୋଇ ଆସିଛୁ ଘରକୁ
ସଙ୍ଗେ ଘେନି ହସ ଖୁସି
ଭୋକିଲା ପେଟର ଭୋକ ମରିଯାଏ
ତୁହିଁ ଦେଲେ ଥରେ ହସି
ତୋ କୁନି ପାଦରେ ଅଳତାର ଗାର
ତା ସାଥେ ପାଉଁଜି ସଜ
ଭଲି ଭାଲିକା ପୋଷାକ ଅତର
ନିଇତି ହେବ ଲୋ ରଜ
ଯାହା ତୁ କହିବୁ ସବୁ ଆଣିଦେବି
ଆଲୋ ମୋର ଚାନ୍ଦମୁହିଁ
ଛାଇ ପରି ତୋର ରହିଥିବି ପାଖେ
ଯେତେ ଦିନ ଥିବି ଜିଇଁ
ସବୁ ଜନମରେ ଆମରି କୋଳରେ
ଜନମ ହେବୁ ଲୋ ତୁହିଁ
ଅମୂଲ୍ୟ ରତନ ଆମରି ତୁ ଧନ
ତୋ ପରି ହେବେନି କେହି
ତୁଳସୀ ଅଟୁ ତୁ ଆମ ଅଗଣାର
ତୋ ଅଙ୍ଗେ ବସୁଧା ବାସ
ବାର୍ଦ୍ଧକ୍ୟ କାଳରେ ବିତ୍ତ ଆମ ପାଇଁ
ତୋ ଓଠର ଖିଏ ହସ
