କହିବନି କେବେ

କହିବନି କେବେ କାହାକୁ ସହଜେ

ହୃଦୟଟେ ଅଛି ତୁମ ଭିତରେ ,

କ୍ଷତାକ୍ତର ଲହୁ ନିଗାଡ଼ିବା ପାଇଁ

ସହଜେ ମିଳିବେ ଏଇ ସଂସାରେ ।୧।

କହିବନି କେବେ ଭଲ ପାଇବାର

ଆବେଗ ରହିଛି ତୁମ ଭିତରେ ,

ନବୁଝି ମହତ୍ତ୍ଵ କରିବେ କ୍ଷତାକ୍ତ

ଶରାଘାତ କରି ହୃଦ ମଧ୍ୟରେ ।୨।

କହିବନି କେବେ ସ୍ନେହୀ ହୃଦୟଟେ

ଲୁଚିକି ରହିଛି ତୁମ ଭିତରେ ,

ବିଶ୍ୱାସ ବଦଳେ କଣ୍ଟା ଆଘାତରେ

ଭିଜାଇବେ ହୃଦ ଆଖି ଲୁହରେ ।୩ ।

କହିବନି କେବେ ହୃଦୟର ବ୍ୟଥା

ହୋଇଥାନ୍ତୁ ପଛେ ନିଜର ଯେତେ,

ଶ୍ରଦ୍ଧାହୀନ ବ୍ୟକ୍ତି ସମୟ ପଡ଼ିଲେ

ସୁଧ ସହ ଫେରେଇବେଟି ସେତେ ।୪।

କହିବନି କେବେ କାହାରି ଆଗରେ

ଶାନ୍ତିରେ ରହିଛ ବୋଲି ଜୀବନେ ,

ଜ୍ଵଳନ ଈର୍ଷାର ତତଲା ନିଆଁରେ

ପୋଡ଼ି ମାରିଦେବେ ବିଟପୀ ମାନେ।୫।