କହିବେନି... କିଛି ଶିଖିନାହୁଁ ବୋଲି

      ଥାଏ ବା ଯେମିତି ସବୁବେଳେ ଏଠି

          ହସ ହସ ଦିଶେ ମୁହିଁ

      ଶିଖିନେବୁ ଯେବେ ନିଜେ ସେମିତିକା

          ହସି ବି ପାରିବୁ ତୁହି ।। 

      ସାଙ୍ଗ ମେଳେ ଥିଲେ ଖୁସିରେ ଖୁସିରେ

           କଥା ହୋଇଥାଏ ମୁହିଁ

      ଶିଖିନେବୁ ଯେବେ ସାଙ୍ଗ ସାଥି ମେଳେ

           ସେପରି କରିବୁ ତୁହି ।। 

      ମିଳିମିଶି ଏଠି ସଭିଙ୍କ ସାଥିରେ

          ସାଥି ହୋଇ ଚଳେ ମୁହିଁ

      ଶିଖିନେବୁ ଯେବେ ସଭିଙ୍କ ସାଥିରେ

          ସେପରି ଚଳିବୁ ତୁହି ।। 

      ପଢା ବେଳଟିରେ ବସି ପଢାଘରେ

          ମନଦେଇ ପଢେ ମୁହିଁ

      ଶିଖିନେବୁ ଯେବେ ବହି ଧରି କାଲି

          ସେମିତି ପଢିବୁ ତୁହି ।। 

      ଖାଇବା ବେଳରେ ବସି ଆସନରେ

          ଆନନ୍ଦରେ ଖାଏ ମୁହିଁ

      ଶିଖିନେବୁ ଯେବେ ବାଢିଦେଲେ ମାଆ

          ସେମିତି ଖାଇବୁ ତୁହି ।। 

      ଅଳସପଣକୁ ରଖିଦେଇ ନିତି

          ନିଜ କାମେ ଥାଏ ମୁହିଁ

      ଶିଖିନେବୁ ଯେବେ ନିଇତି ସେମିତି

          କାମରେ ଲାଗିବୁ ତୁହି ।। 

      ଗୁରୁ ଗୁରୁଜନ ଦେବତା ସମାନ

          ଭକତିରେ ଥାଏ ମୁହିଁ

      ଶିଖିନେବୁ ଯେବେ ବଡ ହେଲେ କାଲି

          ସେମିତିରେ ଥିବୁ ତୁହି ।। 

      କହିବାକୁ ତୋତେ ଭାବିଥିଲି ଯାହା

          କହିଦେଲି ମନ ଖୋଲି

      ମୋ କୁନିରେ . . . ମୋ କୁନାରେ 

      ଶିଖିନେବୁ ଯେବେ କହିବେନି କେହି

          କିଛି ଶିଖିନାହୁଁ ବୋଲି ।।