କେଉଁଦିନ ବୁଦ୍ଧି ହେବ ଉଦ୍ରେକ
କେଉଁଦିନ ବୁଦ୍ଧି ହେବ ଉଦ୍ରେକ
ଆମେ ପରା ଏବେ ବିକାଉ ହେଲେଣି
ଅଧିକାର କଥା କିଏ ଦେଖୁଛି
ପେଟରେ ଗଣ୍ଡିଏ ଦାନା ପଡିଗଲେ
କିଏ ଅବା କାହାକୁ ପଚାରୁଛି ।
ରିଲିଫ୍ ଚାଉଳ ଯୋଗାଇ ଦିଅନ୍ତି
ଅଭାବୀ ହେଉ ବା ଭାବରେ ଥାଉ
ତାଙ୍କ ଗୁଣଗାନ ନ କରିବେ କିଆଁ
ଭୋଟ୍ ଖଣ୍ଡକ ତାଙ୍କୁ ହିଁ ଯାଉ ।
ବିଚାର ଶକ୍ତି ତ ଲୋପ ପାଇଲାଣି
ବିଚାରକ ହେଲେ ପଇସାଖୋର
ମୁଣ୍ଡକୁ ନୁଆଁଇ ହଁ ଭରିବାଟା
ବ୍ଯତୀତ ଆଉ କି ଅଛି ଉତ୍ତର।
ଜୀବନଟା ଏଠି ଦାଦନ ଖଟୁଛି
ଅବିବେକ ପଣେ ଗଣତି ହୋଇ
ନିଜ ଇଚ୍ଛାଶକ୍ତି ଲୋପ ପାଇଲାଣି
ପର ବୁଦ୍ଧିର ଯେ ଆଶ୍ରୟ ନେଇ।
ଇଂରେଜ ଗୋଲାମ ରଖୁଥିଲେ ପୂର୍ବେ
ସ୍ବଧୀନରେ ପରେ ଗୋଲାମ ପଣେ
ଖଟିବା ହେଉଛି ମନ ମାରିଦେଇ
ନାହିଁ ତ ପଡିବା ହରଡଘଣେ।
ବିବେକ ବିଚାର ଖଟାଇ ପାରିଲେ
ଏପରି କାହିଁକି ହୁଅନ୍ତା ଆଜି
ନ୍ଯାୟ ପଥ ଛାଡି ଅନ୍ଯାୟ ପଥରେ
କାହିଁକି ହେ କୁହ ହେଉଛେ ରାଜି।
ପାଠ ପଢି ଯଦି ବୁଦ୍ଧି ନ ଆସିଲା
ଚାକିରି ପାଇଁ କି ପଢୁଛି ପାଠ ?
କେଉଁଦିନ ଆଉ ସୁଦିନ ଆସିବ
କେଉଁଦିନ ବୁଦ୍ଧି ହେବ ଉଦ୍ରେକ ?