କେମିତି ବଞ୍ଚିବୁ
କେମିତି ବଞ୍ଚିବୁ
ବଞ୍ଚିବାକୁ ରାହା, ଦିଅ ସରକାର,
ଦେଢ଼ ଶ' ହେଲା ପିଆଜ ।
ଡାଲି ତେଲ ଲୁଣ, ହୋଇଲା ମହଙ୍ଗା,
ବଞ୍ଚିବୁ କି ପିଇ ପେଜ ।।
ବନ୍ୟାବାତ୍ୟା କାଳ, ହୁଏ ଆମ ପାଇଁ,
ଉଜୁଡି ଯାଏ ଫସଲ ।
ଦରଦାମ ବଢେ, ବନ୍ୟାବାତ୍ୟା ପାଇଁ,
ହେଉ ଅଛୁ କଲ ବଲ ।।
ଚାଷୀ କୁଳ ଦୁଃଖ, ବୁଝୁଅଛ ତୁମେ,
କାଳିଆ ଯୋଜନା କରି ।
ଦର ଦାମ ପାଇଁ, କାତର ନ ହୋଇ,
ରୁହ ଆସନ ଆବୋରି ।।
ଯାହା ଦେଉ ଅଛ, ନିଜ ସ୍ୱାର୍ଥ ପାଇଁ,
ବୁଝୁ ନାହଁ ଆମ କଥା ।
କୁଜି ନେତା ସାଜେ, ନାଗରିକ କଣ୍ଟା,
ଲାଞ୍ଚ ଖାଇ ଦିଏ ବ୍ୟଥା ।।
ଗରିବ ପାଏନା, ନିଜ ହକ୍ ଦ୍ରବ୍ୟ,
ଲାଞ୍ଚ ଦେଇ ନିଏ ଧନୀ ।
କୁଜିନେତା ସାଜେ, ଶାର୍ଦୁଳ ମାର୍ଜlର,
କରି ଦେଇ ହୀନିମାନି ।।
ଦୁର୍ବଳ ଉପରେ, ସବଳର ଚାଲେ,
ନାନା ବିଧ ଅତ୍ୟାଚାର ।
ମନ ମୁଖୀ ହୁଏ, କୁଜି ନେତା ଏଠି,
ଅଧର୍ମେ ହୁଏ ବିଚାର ।।
ଥାନା ନ୍ୟାୟାଳୟ,ହାତରେ ତାଙ୍କର,
ଦୋଷୀକୁ ମିଳେନା ଦଣ୍ଡ ।
ଅଧର୍ମର ଜୟ, ହୁଏ ନ୍ୟାୟାଳୟେ,
ସତ୍ୟ ଖୋଜେ ବଡ଼ଦାଣ୍ଡ ।।
ମତଦାନ ପାଇଁ, ହାତ ଯୋଡ଼ି ଥିଲ,
ଜନତା କରିଲେ ନେତା ।
ଜନତାର ସେବା, ତୁମରି କର୍ତ୍ତବ୍ୟ,
କର୍ତ୍ତବ୍ୟରେ ରଖ ଚେତା ।।
ଖୁସିରେ ଶ୍ରଦ୍ଧାରେ, ବଞ୍ଚିବାକୁ ଦିଅ,
ଜନତାଙ୍କୁ ଦୁନିଆରେ ।
ସମ୍ମାନ ପାଇବ, ମହାନ ହୋଇବ,
ସଦା ଥିବ ଆସନରେ ।।