କବିତା ପର୍ବ : (ଅତିରିକ୍ତ) :101 : ବିଦ୍ୟାଳୟ

ବିଦ୍ୟା ଅଧ୍ୟୟନ ଆଚରଣ ଶିକ୍ଷା ଶୃଙ୍ଖଳାର କେନ୍ଦ୍ର ବିଦ୍ୟାଳୟ,

ଗୁରୁକୁଳ କିବା ଚାଟଶାଳୀ ହେଉ ଆଶ୍ରମ ବି ଥିଲା ଶିକ୍ଷାଳୟ |

ପିଲାଙ୍କ ମଧ୍ୟାହ୍ନ ଭୋଜନ ଚାଲିଛି ହୋଇଗଲା ଭୋଜନାଳୟ,

କୋଭିଡ଼ କରୋନା ରୋଗୀ ରହିବାକୁ ହେଲା ଏବେ ଚିକିତ୍ସାଳୟ |

ପୋଷାକ ବାଣ୍ଟିବେ ସାଇତି ରଖନ୍ତି ତେଣୁ ହେଇଗଲା ବସ୍ତ୍ରାଳୟ,

ସ୍ୱଚ୍ଛ ଭାରତ ଯୋଜନାରେ ଏବେ ତିଆରି ହେଇଛି ଶୌଚାଳୟ |

ଗୁଣ୍ଡା ଟାଉଟର ପିଲା ଲଢେଇରେ ବିଦ୍ୟାଳୟ ହୁଏ ଜମାଳୟ,

କଲେଜ ପିଲାଙ୍କ ପାଇଁ ପାଠାଗାର ଖେଳ ପଡ଼ିଆ ତ ପ୍ରେମାଳୟ |

ଅରମା ବାଳୁଙ୍ଗା ପିଲାଙ୍କ ପାଇଁ ସେ ଥିଲା ଦିନେ ଯନ୍ତ୍ରଣାଳୟ,

ସିଆଇ ଡ଼ିଆଇ ଆସିଲେ ସେଦିନ ହେଇଯାଏ ମନ୍ତ୍ରଣାଳୟ |

ନିର୍ବାଚନ ବେଳେ କେନ୍ଦ୍ର ଖୋଲିଯାଏ ଭୋଟରଙ୍କ ପାଇଁ ଭୋଟାଳୟ,

ବୁଲାଗାଈ ଷଣ୍ଢ ପାଇଁ ସଞ୍ଜବେଳେ ହୋଇଯାଏ ପୁଣି ସୁଖାଳୟ |