କାର୍ତ୍ତିକ ପୂର୍ଣ୍ଣିମା

   କାର୍ତ୍ତିକ ମାସଟି ଭାରି ପୂଣ୍ୟ ମାସ ହବିଶେ କଟଇ ଦିନ,  

ଦେବ ଦରଶନ ପୂଜନ ବନ୍ଦନ ଧରମେ ଲାଗଇ ମନ |୧|       

ପ୍ରତ୍ୟୁଶ ସ୍ନାହାନ ଭଜନ କୀର୍ତ୍ତନ ହରେ କୃଷ୍ଣ ହରେ ରାମ, 

ସଂକୀର୍ତ୍ତନ ତାଳେ ମନ ମୀନ ଖେଳେ ଛାଡ଼ି ପଳାଇବ ଯମ |୨|             

 କାର୍ତ୍ତିକ ଶୁକଳ ଶେଷ ପାଞ୍ଚ ଦିନ ପବିତ୍ର ପଞ୍ଚୁକ ଜାଣ, 

ମନରେ ଧରମ କର୍ମରେ ଧରମ ନିରାମୀଷର ଭକ୍ଷଣ |୩|             

  ମଳ ପଞ୍ଚୁକରେ ଯେବେ ହୋଇଥାଏ ଛଅ ଦିନର ପଞ୍ଚୁକ,

ପ୍ରଭୁ ଜଗନ୍ନାଥ ନାଗାର୍ଜ୍ଜୁନ ବେଶ ଦୁର୍ଲ୍ଲଭ ସାଜ ପୋଷାକ |୪|   

  

   କାର୍ତ୍ତିକ ପୂର୍ଣ୍ଣମା ମହା ପୂଣ୍ୟ ଦିନ ଗାଆଁରୁ ସହର ଯାଏ ,

ପୂଣ୍ୟ ଅରଜନ ପାପ ବରଜନ ସବୁ ପୁଣି ଶୋଭାପାଏ |୫|    

  ଚତୁର୍ଦ୍ଦଶୀ ରାତ୍ରୀ ଉଜାଗର କଟେ ସଂକୀର୍ତ୍ତନ୍ୟେ ନାମ ଗାଇ,  

ପ୍ରଭୁ ରାଧାକୃଷ୍ଣ ବିଜେ କରିଥାନ୍ତି ଭକତ ଗଣଙ୍କୁ ନେଇ |୬|

ଭୋର ସକାଳରୁ କଦଳୀ ପଟୁଆ ବୋଇତ ବନ୍ଦାଣ ହୁଏ,

 ସଭି ଜନଗଣ ନଈ ପୋଖରୀରେ ଦୀପ ଜାଳିଣ ଭସାଏ |୭|     

 ଆ‐କା‐ମା‐ଭୈ ବୋଇତ ଭସାଣ ଉତ୍କଳର ପରମ୍ପରା,

ପୂରୁବ ସ୍ମୃତିକୁ ମନେ ପକାଇବା ସାଧବପୁଅଙ୍କ ନାରା |୮|         

 

 କାର୍ତ୍ତିକ ପୂର୍ଣ୍ଣିମା ଯାତରା ଲାଗଇ ଉତ୍କଳର ଚାରିଆଡ଼, 

ବୋଇତ ବନ୍ଦାଣ ଉତ୍ସବ ହୁଅଇ ସଂସ୍କୃତି ଅଟଇ ବଡ଼ |୯|      

ବଡ଼ ମନ ନେଇ ବଡ଼ ବଡ଼ୁଆଙ୍କୁ ଆଲୋକରେ ବିଭୂଷିତ,     

ପୂର୍ଣ୍ଣିମା ପ୍ରତ୍ୟୁଶୁ ଡଙ୍ଗାଦୀପ ଦାନେ ଧର୍ମ ହୁଏ ପରାପତ |୧୦|