କାଇପଡ଼ା ଗୁଳିକାଣ୍ଡ

ଯାଜପୁର ଜିଲ୍ଲା ବିଦ୍ରୋହୀ ମାତିଲେ-ଅଶାନ୍ତ କଳାମାଟିଆ,

ଦେଶପ୍ରେମୀ ମିଶି ଡକାଇଲେ ସଭା-ଚାଲ କାଇପଡ଼ା ଗାଆଁ |

କାଠଗୋଲାଠାରେ ଜମାହେଲେ ଲୋକ ବରଷାରେ ଭିଜିଭିଜି,

ଶପଥ କରିଲେ ଲଢିକି ମାରିବେ ଲଗାଇ ଜୀବନ ବାଜି |

ଫଉଜ ଆସିଲେ ବନ୍ଧୁକ ସଜେଇ କହିଲେ ଫୁଟିବ ଗୁଳି,

ସାବଧାନ କରି ପୁଲିସ ଠାରିଲା ପଳାଅ ପଳାଅ ବୋଲି |

ପୁଲିସ କଥାକୁ ନକରି ଖାତର ବନ୍ଦୀହେଲେ ବିଦ୍ୟାଧର,

ତା’ପରେ ଅନାମ ଇନ୍ଦ୍ରମଣି ହୃଷୀ କାଇପଡ଼ା ଥରହର |

ଠେଲାପେଲା ପୁଣି ପ୍ରତିବାଦ କଲେ-ଥିଲେ ଯେତେ ଗ୍ରାମବାସୀ,

ମାୟାଧର ବେକ ସନ୍ଧିରେ ପୁଲିସ ବୋୟୋନେଟ ଦେଲା ଭୂଷି |

ଭୁଲି ନିଜକଥା ମାତିଲେ ଜନତା ଫୁଟିଲା ବନ୍ଧୁକ ଗୁଳି,

ଛଅଜଣ ବୀର ଗୁଳିଚୋଟ ଖାଇ ଭୂଇଁରେ ପଡ଼ିଲେ ଢଳି |

ସହିଦ ହୋଇଲେ ମାୟାଧାର ଭୂୟାଁ, ହାଡ଼ିବନ୍ଧୁ ପଣ୍ଡା ଭାଇ,

ସାନନ୍ଦ ସ୍ଵାଇଁ ଓ ସାଉଣ୍ଟି ମଳିକ ରହିଲେ ଅମର ହୋଇ |

000