ଜୟୀ ରାଜଗୁରୁ
ଜୟୀ ରାଜଗୁରୁ
ଓଡ଼ିଶା ରାଇଜେ ଘୋଟି ଆସୁଥିଲା ଅମାରାତି ଅନ୍ଧକାର,
ନାବାଳକ ରାଜା ମୁକୁନ୍ଦ ଦେବ ସେ ନେଇଥିଲେ ରାଜ୍ୟଭାର ।
ଜୟୀ ରାଜଗୁରୁ କୁଳ ପୁରୋହିତ ଶାସନର ମେରୁଦଣ୍ଡ,
ଇଂରେଜ କମ୍ପାନୀ ଚୁକ୍ତିପତ୍ର ପାଇ ଚିରିକଲେ ଖଣ୍ଡଖଣ୍ଡ ।
ଚମକି ଉଠିଲେ ଫ୍ଲେଚର ସାହେବ ହୁକୁମ କରିଲେ ଟାଣ,
କିଏ ସେ ପାଷାଣ୍ଡ ଦେଖିବି ତା’ ଦମ୍ଭ ଇଜିଲାନସକୁ ଆଣ ।
ରାଜଗୁରୁ ବୀର ପାଇକ ହକାରି କରିଦେଲେ ଆକ୍ରମଣ,
ଇଂରେଜ ବାହିନୀ ଅସ୍ତ୍ରଶସ୍ତ୍ର ଆଣି କଲେ ଘମାଘୋଟ ରଣ ।
ଢାଲ ତରବାରୀ ହାରିଲା ଶେଷରେ ବନ୍ଧୁକର ହେଲାଜୟ,
ମୁକୁନ୍ଦ ଦେବଙ୍କୁ ଅଟକ ରଖିଲେ ଦେଖାଇ ମୃତ୍ୟୁର ଭୟ ।
ଜୟୀ ରାଜଗୁରୁ କ୍ଷମା ମାଗିଦେଲେ ରାଜାଙ୍କୁ ମିଳିବ ମୁକ୍ତି,
ଫ୍ଲେଚର ସାହେବ ଆଦେଶ ହୋଇଲା-ନହେଲ ମିଳିବ ଶାସ୍ତି ।
କ୍ଷମାଭିକ୍ଷା କରେନାହିଁ ରାଜଗୁରୁ ତୁମ ଭାଗ୍ୟ ଏବେ ମନ୍ଦ,
ମୁକୁନ୍ଦକୁ ଛାଡ଼ ନୋହିଲେ ଛେଦିବି ଫ୍ଲେଚର ସାହେବ ସ୍କନ୍ଧ ।
ରାଜଗୁରୁ କଥା ଘୂରାଇଲା ମଥା ତୁରିତେ କରିଲେ ବନ୍ଦୀ,
ବିନା ବିଚାରରେ ଫାଶୀ ଦେବାପାଇଁ ଫ୍ଲେଚର କରିଲେ ଫନ୍ଦି ।
ବାଘିତୋଟା ବଡ଼ ବରଗଛ ଡାଳେ ବାନ୍ଧିଦେଲେ ଦୁଇଗୋଡ଼,
କାଟିଦେଲେ ଡାଳେ ବନ୍ଧା ଦଉଡ଼ିକୁ ଚିରି କଲେ ଦୁଇଫାଳ ।
ଆତଙ୍କ ବଢାଇ ଫ୍ଲେଚର ବର୍ବର କଲା ବଡ଼ ହୀନକାର୍ଯ୍ୟ,
ଜୟୀ ରାଜଗୁରୁ ରହିଲେ ଆମର ଥିବାଯାଏ ଚନ୍ଦ୍ର ସୂର୍ଯ୍ୟ ।