ଜୟ ମା' ବିରଜା

ଜୟ ମା' ବିରଜା ତିନି ପୁରେ ପୂଜା 

   ଧ୍ୱଜା ଉଡ଼େ ଯାଜପୁରେ l

ତୋହର ପ୍ରସାଦୁ ଯଯାତି କେଶରୀ 

  ରାଜା ହେଲେ ଉତ୍କଳରେ ll

ମହାଭାରତ ଓ କେତେ କେତେ ଶାସ୍ତ୍ରେ 

    ତୋର ମହିମା ବର୍ଣ୍ଣିତ l

ମହିଷା ଲାଙ୍ଗୁଳ ଏକ ହସ୍ତେ ଧରୁ 

   ଦ୍ୱିତୀୟ ତୋ ଶୂଳ ହସ୍ତ ll

ବ୍ରହ୍ମା ଆରମ୍ଭିଲେ ଏକ ପୁଣ୍ୟ ଯଜ୍ଞ 

   ଉତ୍କଳ ଜାହ୍ନବୀ ତୀରେ l

ସେ ଯଜ୍ଞ ଉତ୍ଥିତା ମାତା ଜଗନ୍ମାତା 

   ବାସ ବିରଜା ତୀର୍ଥରେ ll

ଶ୍ରୀଯଜ୍ଞ ବରାହ ସ୍ୱୟଂ ସାକ୍ଷୀ ଛନ୍ତି 

   ପୂଣ୍ୟ ଦଶାଶିନି ଘାଟେ l

ସପତ ମାତୃକା ବିଜେଛନ୍ତି ପୁଣି 

   ବୈତରଣୀ ଆର ପଟେ ll

ଦଶ ଅଶ୍ୱମେଧ ସମ୍ପାଦିଲେ ପୁଣି 

   ରାଜା ଯଯାତି କେଶରୀ l

କାନ୍ୟକୁବ୍ଜ ଠାରୁ ଦଶ ସସ୍ର ବିପ୍ର 

   ସୁଖେ ଆଣି ଥିଲେ ବରି ll

ସେ ସ୍ମୃତିକୁ ବହି ଏବେ ରାଜୁଥାଇ 

   ଦଶାଶ୍ୱମେଧର ଘାଟ l

ଯଜ୍ଞ ଯୋଗୁଁ

Advertisement

ସିନା ଯାଗପୁରୁ ନାମ 

  ଯାଜପୁର ହେଲା ଖ୍ୟାତ ll

ତୋ ପିଠରେ ବିଜେ ପୁଣ୍ୟ ନାଭିଗୟା 

    କ୍ଷେତ୍ର ପରମ ପାବନ l

ପିତର ପୁରୁଷ ମୋକ୍ଷ ଲଭିଥାନ୍ତି 

    ପାଇ ତହିଁ ପିଣ୍ଡ ଦାନ ll

ବରାହ ବିରଜା ବିପ୍ର ବୈତରଣୀ  

  ବେଦ ଯୋଗୁଁ ଅଟେ ପୁଣି l

ପଞ୍ଚ ବ' କାର ଏ କ୍ଷେତ୍ରବର ଖ୍ୟାତ 

   ବଖାଣି ଅଛନ୍ତି ଜ୍ଞାନୀ ll

ଗଦା କ୍ଷେତ୍ର ବୋଲି ପ୍ରସିଦ୍ଧ ଜଗତେ 

   ଦୁଆରେ କଂସା କବାଟ l

ଭୈରବୀ ଭୈରବ ରଡ଼ି ଡାକ ଦେବେ 

   କଳିଯୁଗ ହେଲେ ଅନ୍ତଃ ll

ଜଗତେ ପ୍ରସିଦ୍ଧ ପୁଣ୍ୟ ଶକ୍ତି ପୀଠ 

    ଏକାବନ ମଧ୍ୟେ ସ୍ଥାନ l

ଦ୍ୱି ଭୁଜା ମୂରତି ବିରଳ ଜଗତେ 

  ମାଆ ମୋର ମହୀୟାନ ll

ଜୟ ମା' ବିରଜା ତୋତେ କରେ ପୂଜା 

    ଜୟ ମା' ମଙ୍ଗଳମୟୀ l

ହୃଦୟ ମୋହର ପୂଜା ବେଦୀ ହେଉ 

    ତଵ ନିରାଜନା ପାଇଁ ll