କାଳିଆର ଡୋରି
କାଳିଆର ଡୋରି
ଚାଲ ସଖି ଆମ୍ଭେ ନୀଳାଚଳେ ଯିବା
କାଳିଆର ପୁଣି ଲାଗିଲା ଡୋରି l
ଥକା ମନ ଚକା ଆଖିକୁ ଦେଖି ଯା
ଚିଟାଉ ଲେଖିଛି ଶ୍ରୀକ୍ଷେତ୍ର ଶିରି ll
ଚୌର ପଣେ ଚୋର ଚତୁରେ ଚତୁର
ଚାତୁରେ ବାନ୍ଧିଲା ଗୋପର ନାରୀ l
ବନ୍ଧୁ ପଣେ ପୁଣି ବନ୍ଧୁଆ ମହାନ୍ତି
ଭୋଗ ଥାଳି ଦେଇ ନେଇଛି ବରି ll
ଶ୍ରୀଫଳ ନଡ଼ିଆ ତା ପାଇଁ ବଢ଼ିଆ
ବଢ଼ାଇ ଦେଲା ଦାସିଆ ବାଉରୀ l
ଚଇତନିଆକୁ କୀର୍ତ୍ତନିଆ କରି
ନଚାଇଲା ଦାଣ୍ଡେ ମୃଦଙ୍ଗ ଧରି ll
ଯବନ ଭକତେ ମଗନ ହୋଇଲା
ସାଲବେଗ ଡାକେ ଆହେ ଶ୍ରୀହରି l
ବଡ଼ ଦାଣ୍ଡେ ନନ୍ଦିଘୋଷ ଅଟକିଲା
ଛିଡ଼ାଇ ନପାରି ଭକତି ଡୋରି ll
ପଥରେ ତାରିଲା ପଥର ନାୟିକା
ପାଷାଣୀ ଅହଲ୍ୟା ଗୌତମ ନାରୀ l
ପଥର ଭାସିଲା ସେତୁବନ୍ଧେ ପୁଣି
ବାନ୍ଧିଲେ ପଥର ଭେଳାକୁ କରି ll
ଗୋପ ତେଜ୍ୟା କରି ମଥୁରାକୁ ଗଲେ
ସଳଖିଲେ କୁଜି କୁବୁଜା ନାରୀ l
ଅଷ୍ଟ ମଲ୍ଲ ମାରି ଧନୁ ଯାତ୍ରା ଗଲେ
ମଉଳା ମଞ୍ଚାରୁ ପଡ଼ିଲା ମରି ll
ଇନ୍ଦ୍ରର ବିବାଦୁ ଗୋପକୁ ରଖିଲେ
ବାମ କରେ ଟେକି ଗୋବରା ଗିରି l
ଭକତ ବାଉଳା ଭକ୍ତଭାବେ ଭୋଳା
ଦର୍ଶନ କରିବା ସେ ଗିରିଧାରୀ ll
ବଡ଼ କପଟିଆ ସେ କଳା ଠାକୁର
ହେଳା କରନାହିଁ ତାହାର ଡୋରି l
ସେ କଳା ଗୋବିନ୍ଦ ହସେ ମନ୍ଦ ମନ୍ଦ
ଜୟ ଜଗନ୍ନାଥ ଗୋବିନ୍ଦ ହରି ll