ଜନ୍ମରୁ ଜନ୍ମାନ୍ତର

ନଭମଣ୍ଡଳରୁ ପୃଥିବୀକୁ ଶୁଭୁଛି

କାହାର ଏ ବଇଁଶୀ ସ୍ୱର ?

ଗଡ଼ିଆରୁ ଜଳ ଉଛୁଳିଲାପରି

ଉଛୁଳିପଡୁଛି ଜୀବନ |

ସେ ସ୍ଵନର ଶ୍ରବଣରେ

ବଢୁଛି ହୃଦୟ ସ୍ପନ୍ଦନ |

ସେ ବଇଁଶୀର ତାନେ ତାନେ

ଚାରିଆଡ଼େ ଖେଳେ ପ୍ରେମର ତରଙ୍ଗ,

ଦିବ୍ୟ ସେ ଶୂନ୍ୟ ଆକାଶର ସ୍ୱର

କରେ ମୋତେ ଦିବ୍ୟ ପ୍ରେମରେ ବିଭୋର

ମୋ ମନ ମୋ ପ୍ରାଣ ଛୁଇଁ ଛୁଇଁ

ମୋ ଆତ୍ମାକୁ ଯୋଡୁଛି ପରମାତ୍ମା ସହ |

ନଈର କଳ କଳ ଶବ୍ଦ

ପକ୍ଷୀମାନଙ୍କର କଳରବ

ମଧୁମକ୍ଷିଙ୍କ ଗୁଞ୍ଜନ

ଜୀବନର ହସ କାନ୍ଦ

ସବୁଥିରେ ଭରିରହିଛି

ସେହି ମହାଜୀବନର ସ୍ୱର |

ବିଶ୍ୱାତ୍ମାଙ୍କର ସେ ବଇଁଶୀର ସ୍ୱର

ଚେତନାକୁ ଜାଗ୍ରତକରେ ବାରମ୍ବାର,

ତାହା ଅଟେ ଦିବ୍ୟ ପ୍ରେମ

ତାହା ଅଟେ ଶବ୍ଦ ବ୍ରହ୍ମ

ତାହା ହିଁ ଦିବ୍ୟ ଜ୍ଞାନ,ପୁର୍ଣ ଜ୍ଞାନ, 

ସେ ପ୍ରେମଜ୍ଞନରେ ତଲ୍ଲୀନ ମୁଁ

ଜନ୍ମରୁ ଜନ୍ମାନ୍ତର |