ଜନ୍ମଦିନ

ନର, ପଶୁପକ୍ଷୀ, କୀଟ, ତରୁଲତା

ସର୍ବେ ଈଶ୍ବର ପ୍ରେରିତ,

ହୋଇ ବାନ୍ଧି ହ୍ବ'ନ୍ତି ସମ୍ପର୍କ ସୂତ୍ରରେ

ଜନମି ଏହି ମରତ,

ସଭିଙ୍କର ଜନ୍ମଦିନ,

ନିର୍ଦ୍ଦିଷ୍ଟ ଦିବସ ଲୀଳାମୟ ପ୍ରଭୁ

କରିଥା'ନ୍ତି ନିର୍ଦ୍ଧାରଣ ।

ଏ ସଚରାଚର ଚେତନ ମଣିଷ

ପାଳଇଟି ଜନ୍ମଦିନ,

ବରଷକେ ଥରେ ଖୋଜା ପଡ଼ିଥାଏ

ତା'ର ସେହି ଶୁଭଲଗ୍ନ,

କିଏ ସେ କେତେ ପ୍ରକାରେ

ଏ ଜନ୍ମଦିନକୁ ପାଳନ କରନ୍ତି

ଏହି ମର୍ତ୍ତ୍ୟମଣ୍ଡଳରେ ।<

Advertisement

/p>

ଆମ ପିଲାଦିନେ ବୋଉ କରୁଥିଲା

ତିଆରି ସରୁଚକୁଳି,

ତା' ମଝିରେ ଗୁଡ଼ ମେଞ୍ଚେ ଥୋଇଦେଇ

ଥିଲୁ ଜନ୍ମଦିନ ପାଳି,

ହଜିଛି ସେ ମଧୁ ସ୍ମୃତି,

ଆଜି କେକ କାଟି ମହମବତୀ ଫୁଙ୍କି

ଜନମଦିନ ପାଳନ୍ତି ।

ଜୀବନର ପ୍ରତି ପଦକ୍ଷେପେ ଆଜି

ପାଶ୍ଚାତ୍ୟ ସଭ୍ୟତା ବରି,

ନିଜର ସଂସ୍କୃତି ପରମ୍ପରାଟିକୁ

ଦେଉଛନ୍ତି ଅପସାରି,

ଏତ ବଡ଼ ଅଶୋଭନ,

ନିଜ ରୀତିନୀତି ଅନୁସରଣରେ

ପାଳରେ ଜନମଦିନ ।