ଜନ୍ମଦିନ

ତୁମେ ଆସ ଏକ ଉଲ୍ଲାସର ଫୁଲତୋଡ଼ା ଧରି

ପ୍ରତି ବର୍ଷ ମୋ ଜନ୍ମ ତିଥିରେ

ମୋତେ ବଧାଇ ଦେବାକୁ ନୁହେଁ

ମୋ ଧୀରେ ଧୀରେ ବୃଦ୍ଧତ୍ୱ ଆଡକୁ 

ଯାତ୍ରା କରୁଥିବାର ବାସ୍ତବିକତାକୁ ଲୁଚେଇ ଦେଇ

ମୋତେ ଭୁଲେଇ ଦେବାକୁ ଆସ

ମୋ ବୁଦ୍ଧିକୁ ଭ୍ରମିତ କରି। 

ତୁମେ ଆସ ଏକ ବୟସର ପ୍ରମାଣପତ୍ର ଧରି

ପ୍ରତିବର୍ଷ କିଛି ଉଦ୍ଦାମତା ସହ

ମୋତେ ସଜେଇ ଦେବାକୁ ନୁହେଁ

ବେଳୁବେଳ ସରି ଆସୁଥିବା

ମୋ ସୌନ୍ଦର୍ଯ୍ୟକୁ ଉପହାସ କରି

ତୁମେ ମନେମନେ ହସୁଥାଅ

ମୋ ଖୁସିରେ ଫାଟିପଡୁଥିବା ଚେହେରାକୁ ଚାହିଁ। 

ତୁମେ ଆସ ଏକ ଶୁଭେଛାର ବଗିଚାଟେ ଧରି

ପ୍ରତିବର୍ଷ କିଛି ସଂକଳ୍ପ ଧରେଇ ଦେଇ

ମୋତେ ପରଖିବାକୁ ଓ ପରୀକ୍ଷା ନେବାକୁ

ଓ ଦେଖି ଦେଖି ମୁରୁକି ହସୁଥାଅ

ମୋ ଅସଫଳତା ଓ ଖିଆଲିପଣକୁ

ମୁଁ ଯେବେ ଅବସାଦର ଅବଗୁଣ୍ଠନରେ

ଧୀରେଧିରେ ନଇଁ ପଡ଼ୁଥାଏ।