ଜନ୍ମଭୂମି

ସାରା ଜଗତର ସଂକ୍ଷିପ୍ତସାର ଭାରତ ମୋ ଜନ୍ମଭୂଇଁ,

ପବିତ୍ର ଓଁକାର ଝଙ୍କୃତ ହେଲା ଯେ ଭୂଇଁରୁ ନଭଛୁଇଁ ।

ଯେଦେଶ କୃଷକ ଲଙ୍ଗଳ ମୂନରେ ମାଟିରୁ ଫଳାଏ ସୁନା,

ଯେଉଁ ଦେଶେ ଗଙ୍ଗା ଯମୁନା ବହୁଛି ଉଡୁଛି ତ୍ରିରଙ୍ଗା ବାନା ।

ହିମାଳୟ ଯା'ର ମଥାର ମୁକୁଟ ପାଦୁକା କନ୍ୟାକୁମାରୀ

ମହାନନ୍ଦେ ଯା'ର ପଦଧୌତ କରେ ସାଗର ତୋଳି ଲହରୀ ।

ରାମାୟଣ ମହାଭାରତର ସାକ୍ଷୀ ରାମ କୃଷ୍ଣ ଲୀଳା ଭୂଇଁ,

ବୁଦ୍ଧ ମହାବୀର ଶଙ୍କର ଚୈତନ୍ୟ ଗାନ୍ଧୀ ଜନ୍ମ ନେଲେ ଯହିଁ ।

ଯେଉଁ ଦେଶ ନାରୀ ସତୀ ସ୍ବାଧୀ ପୂଣ୍ୟା ପତିବ୍ରତା ଧର୍ମେ ବ୍ରତୀ,

ଯହିଁ ଜନମିଲେ ସୀତା ସାବିତ୍ରୀ ଅନୁସ୍ଵୟା ଦମୟନ୍ତି ।

ବାଲମିକ ବ୍ୟାସ କାଳିଦାସ ଭଞ୍ଜ ରାଧାନାଥ ଗଙ୍ଗାଧର,

ବିହ୍ମଣ ଭାରବୀ ମାଘ ଆଦି କବି ରଚିଲେ କାବ୍ୟ ସମ୍ଭାର ।

ନାନା ଜାତି ଭାଷା ବର୍ଣ୍ଣ ସମାହାର ଧର୍ମ ନିରପେକ୍ଷ ରାଷ୍ଟ୍ର,

ବିଭିନ୍ନତା ତଳେ ସୁଦୃଢ଼ ଏକତା ଯେ ଭୁଇଁରେ ପରିଦୃଷ୍ଟ ।

ମାଆ ମାଟି ମୋର ପ୍ରିୟ ଜନ୍ମଭୂମି ସରଗ ଠାରୁ ବି ବଡ,

ଦେଶ ହିତେ ଜାତି ହିତେ କାମକରି ହେବି ସେହିପରି ବୀର ।