ଜୀବନ ଜୀବିକା ଓ ଅର୍ଥନୀତି
ଜୀବନ ଜୀବିକା ଓ ଅର୍ଥନୀତି
ବିଶ୍ୱରେ ବିଶାଳ ଜନସଂଖ୍ୟା ଦେଶ
ଆମର ଭାରତ ବର୍ଷ ।
ବିକାଶ ପଥରେ ଅଗ୍ରସର ବେଳେ
କୋରନା ଭରିଲା ବିଷ ।୧।
ଭୂତାଣୁ ଭୟରେ ବସୁଧା ବକ୍ଷରେ
ଆତଙ୍କ ରାଜକୁ ଦେଖି ।
ଆମ ସରକାର ପଦକ୍ଷେପ ନେଲେ
ଆଗାମୀ ସ୍ଥିତି ପରଖି ।୨।
ତାଲା ବନ୍ଦ ପାଇଁ ସମଗ୍ର ଦେଶରେ
ଡାକ ଦେଲେ ସରକାର ।
ଗୃହବନ୍ଦୀ ହୋଇ ରହିବା ଜରୁରୀ
ସଂକ୍ରମଣ ହେବ ଦୂର ।୩।
ସରକାରଙ୍କର ଏହି ପଦକ୍ଷେପ
ଅତ୍ୟନ୍ତ ସ୍ୱାଗତ ଯୋଗ୍ୟ ।
ପ୍ରଥମ ସୁରକ୍ଷା ମାନବ ସମ୍ବଳ
ଯେଉଁମାନେ ଦେଶ ଭାଗ୍ୟ ।୪।
ପେଟ ପାଇଁ ନାଟ ସାରା ଜଗତରେ
ସମସ୍ତଙ୍କୁ ଏହା ଜଣା ।
ପେଟ ଭରିବାକୁ ଜୀବିକା ଜରୁରୀ
କେମିତି ହେବ ଭରଣା ।୫।
ଭାରତ ବର୍ଷର ଦିନ ମଜୁରିଆ
କୃଷକ ଶ୍ରେଣୀର ଲୋକ ।
ଯେଉଁମାନଙ୍କର ପରିଶ୍ରମ ଫଳେ
ଜନତାଙ୍କ ମେଣ୍ଟେ ଭୋକ ।୬।
କୃଷକ ଫସଲ କ୍ଷେତରେ ସଢ଼ୁଛି
କୋରନା ଦେଉଛି ଦୁଃଖ ।
ଦିନ ମଜୁରିଆ ବେକାର ବୁଲୁଛି
ଦେଖି ହେଉନାହିଁ ଭେକ ।୭।
ଜୀବିକା ହରେଇ ସର୍ବେ ବସିଛନ୍ତି
ଘାରୁଛି ପେଟରେ ଭୋକ ।
ଦେଶକୁ କିପରି ଦାନା ଯୋଗାଇବେ
ଖାଇବେ ଦେଶର ଲୋକ ।୮।
ଜୀବନ ଜୀବିକା ମୁଦ୍ରା ଦୁଇ ପାର୍ଶ୍ଵ
ଅଲଗା କିପରି ହେବ ।
ଜୀବିକା ହାରିଲେ ଜୀବନ ମରିବ
କିଏ ଦେବ କାହା ଦୋଷ ।୯।
କୃଷକ କାନ୍ଦୁଛି ଚାଷ କ୍ଷେତେ ବସି
ଫସଲ ଉଜୁଡି ଗଲା ।
ଦେଶର ଶ୍ରମିକ ଜୀବିକା ଖୋଜୁଛି
ସବୁଆଡେ ଏବେ ତାଲା ।୧୦।
କର୍ମହରା ହୋଇ ଦେଶରେ ଶ୍ରମିକ
ପେଟରେ ଭୋକର ନାତ ।
ପ୍ରାଣ ବିକଳରେ ବସି ରହିଛନ୍ତି
ନୟନେ ଲୋତକ ସ୍ରୋତ ।୧୧।
ଘରେ ଫେରିବାକୁ ଗାଡିଘୋଡା ନାହିଁ
ରାସ୍ତାଘାଟ ଖାଆଁ ଖାଆଁ ।
ଦେଶ ବିଦେଶରେ ଭୋକ ଉପାସରେ
ପାଦ ଚଲା ରାସ୍ତା ସାହା ।୧୨।
ଏକତ୍ର ହୋଇଲେ ସଂକ୍ରମଣ ଭୟେ
ପୋଲିସ କର୍ତ୍ତବ୍ୟ ରତ ।
ଗହଳି ଦେଖିଲେ ନେତା ମିଡିଆଙ୍କ
ଟିଆର୍ପି ନେବାରେ ବ୍ୟସ୍ତ ।୧୩।
ଅଥୟ ହେଉଛି ଖଟିଖିଆ ମନ
ସମସ୍ତେ ଉପାୟ ଶୂନ୍ୟ ।
ଦେଶ ଅର୍ଥନୀତି ହୁଏ ଅଧୋଗତି
ଜୀବନକୁ ଦେଲେ ଧ୍ୟାନ।୧୪।
ଜୀବନ ସହିତ ଜୀବିକା ବଞ୍ଚିଲେ
ଦେଶ ଅର୍ଥନୀତି ସ୍ଥିତି ।
ସୁଦୃଢ଼ ହୋଇବ ଭବିଷ୍ୟତ ପାଇଁ
ପ୍ରଗତିରେ କରି ଗତି ।୧୫।
ଦେଶବାସୀଙ୍କର ସହଯୋଗ ଲୋଡ଼ା
ରଖିବାକୁ ଦେଶ ମାନ ।
ଜୀବନ ସହିତ ଜୀବିକା ବଞ୍ଚିବ
ସରକାର ଦେବେ ଧ୍ୟାନ ।୧୬।