Library
Profile
ଜୀଅନ୍ତା ଭୂତ
ଜୀଅନ୍ତା ଭୂତ
ଆଜି ପୁଣି ଏକ ଡାହାଣୀକୁ ଦେଖ
ଖାଉଛି ଗୋଇଠା ମାଡ
ନିଅନ୍ତି ଘୋଷାରି ବିବସନା ନାରୀ
କାନ୍ଦି କହେ ଛାଡ ଛାଡ ।
ପଥଚାରୀ ଲୋକେ ଅଟକିଲେ ଥୋକେ
ନାରୀଦେହ ଲାଗେ ମଜା
ନଶୁଣି ପ୍ରାର୍ଥନା ଦିଅନ୍ତି ଯାତନା
କାହାକୁ ବି ନାହିଁ ଲଜ୍ଜା ।
ସତେ କି ଏ ରାଣ୍ଡ କରୁଥିଲା କାଣ୍ଡ
ଗାରେଡି ମନ୍ତର ଶିଖି
ଡାହାଣୀରେ ଗଣା ପଡିଲାଣି ଜଣା
କରେ ଯାହା ଟିକିନିଖି ।
ଖାଇ ଖାଇ ଜୀବ କଳା ତା'ର ଜିଭ
ଦୂରୁ ନିଏ ରକ୍ତ ଶୋଷି
ବର୍ତ୍ତିଛି ବା କିଏ ଛେଳି ରୂପେ ସିଏ
ଟୋକାଙ୍କୁ ରଖିଛି ପୋଷି ।
ସ୍ବାମୀକୁ ସେ ମାରି ବସତିରୁ ଚାରି
ପିଲାଙ୍କୁ ନେଲାଣି ଚାଟି
ପଡିଛି ତ
ଧରା କରି ଦରମରା
ଚୂଟି ନିଆଯିବ କାଟି ।
କାନ୍ଦୁ ଯେତେ ଉଚ୍ଚ ଇଜ୍ଜତ ତା' ତୁଚ୍ଛ
ଅର୍ଦ୍ଧନଗ୍ନେ ରହୁ ଛିଡା
ପଦେ ବି ନଶୁଣି ଦେହସାରା ଝୁଣି
ଦେବେ ମର୍ମାନ୍ତକ ପୀଡା ।
ପୁରୁଷ କି ଆଜି ଉଗ୍ରରୂପ ସାଜି
ନିଜକୁ ନପାରେ ଚିହ୍ନି
ପଡେ ରକ୍ତଛିଟା ଫିଙ୍ଗିଲେଣି ଇଟା
ପାଇ ତାକୁ ଏକାକିନୀ ।
ଏ କଳଙ୍କ ପ୍ରଥା ନୁହେଁ ନୂଆ କଥା
ଘଟୁଛି ଭାରତବର୍ଷେ
ନାରକୀୟ ଦଶା ଦେଖି ଏ ତାମସା
ଜାତି ମୋ' ଉଛୁଳେ ହର୍ଷେ ।
ନାରୀର ସମ୍ମାନ କନ୍ଦୁକ ସମାନ
ଏହାତେ ସେହାତେ ଖେଳେ
ପୌରୁଷର ଘାତେ ବିଳପଇ ଆର୍ତ୍ତେ
ଜୀଅନ୍ତା ଭୂତଙ୍କ ମେଳେ ।
