ଜାଣି ରଖ

ପିଲାଏ ଏତିକି ଜାଣିରଖ

   ମହତ ବଚନ ଗାଉ ମୁଖ

ଲବକୁଶ ପରି ରାମାୟଣ ଗାଇ

  ଗୁରୁଜନ ପଦେ ଭକ୍ତି ଶିଖ l

ଗୁରୁଭକ୍ତି ସଦା କରୁଥାଅ

   ବଡ ସାନ ନିତି ମାନୁଥାଅ

ଏକଲବ୍ୟ ପରି ପ୍ରିୟ ଶିଷ୍ୟ ହୋଇ

  ଗୁରୁଙ୍କ ଆଶିଷ ପାଉଥାଅ l

କୁହନାହିଁ କେବେ ମିଛ କଥା

  ଆନମନା ହୁଅନି ଅନ୍ୟଥା

ପଦେ ମିଛ ପାଇଁ ଧର୍ମ ଯୁଧିଷ୍ଠିର

  ନର୍କ ଦେଖି ଭୋଗିଥିଲେ ବ୍ୟଥା l

କରିବ ସର୍ବଦା ପିତୃଭକ୍ତି

  ବିପଦରୁ ହୋଇବ ମୁକତି

ପିତୃସତ୍ୟ ପାଳି ପ୍ରଭୁ ରାମଚନ୍ଦ୍ର

  ରଖିଥିଲେ ଯଶ ଓ କିରତି l

ଗୁରୁଜନ କଥା ମାନୁଥିବ

   ଖଳ ପ୍ରବୃତ୍ତିକୁ ଛାଡ଼ିଦେବ

ଉଚ୍ଚନୀଚ୍ଚ ଭାବ ଭୁଲିଗଲେ ତୁମେ

   ସଭିଙ୍କ ଆଦର ପାଉଥିବ l